Die Suid-Afrikaanse blombedryf hoop vir ‘n beter wisselkoers in 2011 sodat hulle meer internasionaal mededingend kan wees, sê die SA Blomkwekersvereniging.
Mnr. Rene Schoenmaker, voorsitter, sê: “Ons hoop dat ons in 2011 die einde van die resessie sal sien en dat die wisselkoers vir ons meer gunstig sal raak sodat ons wêreldwyd meer mededingend kan word.”
Die blomsektor verdien jaarliks sowat R500 miljoen met uitvoere, terwyl dit plaaslike ‘n inkomste van sowat R400 miljoen het.
Vulkaan skep probleme
Schoenmaker het vroeër die jaar gesê dat die tydelike staking van vlugte na Europa en Brittanje weens vulkaniese as afkomstig van vulkaan Eyjafjallajökull in Ysland, die bedryf R2,4 miljoen gekos het.
Hy sê die mark het wel goed herstel ná dié voorval. Volgens Schoenmaker het Transnet se staking die jaar min tot geen invloed op die blommemark gehad.
Die droogte wat groot dele van die land teister het nie ‘n groot invloed op blomboere nie. Schoenmaker sê blomboere is in beheer van hulle besproeiing en op die korttermyn is hulle nie baie afhanklik van reënval nie. Hulle is wel baie dankbaar vir die reën wat reeds geval het, aangesien dit beteken dat grondwater op dieselfde vlakke sal bly.
Boer se perspektief
Intussen sê mnr. Willem Slootweg, ‘n blomboer van Brits, hy is onseker oor wat om in 2011 te verwag, aangesien die resessie steeds ‘n invloed op veral die Europese mark het.
Slootweg sê 2010 was ‘n goeie jaar vir hom. “Die staking van vlugte het teen die einde van die uitvoerseisoen gekom. Ek het net twee vragte blomme verloor.” Die uitvoerseisoen loop van Oktober tot April. Slootweg plant tans 24 somer-blomsoorte op 9 ha van sy plaas.
24 November 2010
