Met drie wyne onder die top-tien van die Cape Port and Wine Challenge en vier goue medaljes vir sy porte is die Boplaas-wynkelder ’n trotse Suid-Afrikaanse wynprodusent. Die kelder se Tinta Chocolat 2011 het die hoogste punt in die top-tien van die kompetisie behaal.
Volgens ’n mediaverklaring is die ander twee wenwyne onder die top-tien die Boplaas Portugese Connection 2011 en die Boplaas Tinta Barocca 2009. Rooi tafelwyne – gemaak van Portugese rooi kultivars –is vanjaar die eerste keer ook in die kompetisie beoordeel.
Die Boplaas Tinta Chocolat 2011 word beskryf as ’n pragtige rooiwyn met ’n rooi kleur, bessie- en sjokoladegeure met ’n goed gebalanseerde gevoel in die mond en ’n lang nasmaak. Dit word 10 tot 12 maande lank in Franse eikehout verouder.
Belangstelling
Mnr. Carel Nel, keldermeester van Boplaas en voorsitter van die Kaapse Portprodusentevereniging (CAPPA), is baie opgewonde oor die nuwe belangstelling van lede van die vereniging sowel as die publiek in die Portugese rooikultivar-tafelwyne.
Hy sê hy en sy dogter, Margaux, wynmaker by Boplaas, doen baie moeite in die wingerde en die kelder om rooi tafelwynevan ’n wêreldklas te maak – met die klem op Portugese rooi kultivars.
Boplaas se portstylwyne het ook uitstekend in die kompetisie gevaar, met die Cape Ruby Port wat weer as die beste Ruby Port aangewys is. Nóg vier goue medaljes is aan die Boplaas Cape Vintage Reserve Port 2002, Boplaas Cape Vintage Reserve 2010 en 2007 en Boplaas Cape Tawny Show Reserve toegeken.
