’n Brand wat oor middagete in een van Robertson Winery se primêre produksie-aanlegte uitgebreek het, behoort nie ’n invloed te hê op die naderende parstyd nie.
Mnr. Rianco van Rooyen, keldermeester, sê hulle weet nog nie wat die brand veroorsaak het nie.
“Dit het rof gelyk weens die swart rook, maar gelukkig was die brandweer gou op die toneel en almal het goed saamgewerk om dit spoedig in bedwang te kry.”
Volgens hom het hulle sedertdien al deur die aanleg gestap. Dit is oorkant die pad van Robertson Winery geleë is en hulle verwerk jaarliks sowat 1 000 ton druiwe in dié aanleg.
“Dis donker daarbinne en alles
is vol roet, maar ons kon klaar sien sowat 90% van die pompe makeer niks nie,
die tenke en elektronika is ook nie beskadig nie en selfs die leë vate in die
gebou het niks oorgekom nie. Die versekering sal môre kom kyk en dan sal ons
bepaal of daar skade aan die verkoelingstelsel is.”
Van Rooyen sê daar was geen wyn, verpakkingsmateriaal of bottels in die gebou nie.
“Dis nooit lekker as so iets gebeur nie, maar dit lyk tans erger as wat dit is. Dit sal ons glad nie raak nie en ons pars sal middel Februarie kan voortgaan soos gewoonlik.”
