Chenin blanc, ’n druifsoort waarvoor Suid-Afrika wêreldwyd geloof word, se waarde het binne tien jaar tot bykans R8 miljard (R7,935,510,000) geklim.
Sawis-syfers toon Chenin blanc-druiwe is in 2020 vir gemiddeld R2 917/t verkoop, teenoor R977 wat boere in 1998 vir ’n ton verdien het. Chenin-uitvoer (verpakte en grootmaatwyn) het ook baie fluks met bykans 30 miljoen liter gegroei in dié tyd.
Me. Ina Smith, bestuurder van die CBA, sê as jy die geproduseerde Chenin blanc-liters na bottels omskakel en ’n verkoopprys van sowat R100 per bottel daaraan heg, kom die waarde van die bedryf te staan op sowat R8 miljard.
Daar is meer Chenin blanc in Suid-Afrika aangeplant as in die res van die wêreld tesame.
Volgens Forrester was die druiwepryse die primêre aandrywer vir die waardetoevoeging.
“As ’n gevolg het die wynpryse ook gestyg. Dit is suiwer aangedryf deur die vraag. Soos meer en meer mense gehaltewyn van Chenin blanc onder private handelsmerke gemaak het, het die kultivar gewilder geraak. Ons hoor ál meer van mense wat sê hulle drink nét Chenin blanc. Dit kan sonder twyfel as dié witwyn van Suid-Afrika beskou word.”
Smith het onlangs uit Frankryk teruggekeer waar sy Suid-Afrikaanse Chenin blanc aan wynliefhebbers van reg oor Europa en die Verre Ooste vertoon het.
“Daar was ook produsente uit die Loire-vallei (die Franse streek waar Chenin blanc sy oorsprong gehad het) en ek kan bevestig ons Chenins kan met trots op internasionale platforms meeding.”
Verbetering in gehalte
Mnr. James Pietersen, voorsitter van die Top 10-beoordelaarspaneel, sê dit is ongelooflik om te sien hoe die gehalte van Suid-Afrikaanse Chenin blanc die afgelope jare verbeter het.
“Jy sien hoe vernuwend wynmakers is en hoe hulle aan die voorpunt van die kurwe bly. Hulle span interessante tegnieke in, soos amfore en diamantvormige tenke. Daar is ’n deurlopende strewe na uitnemendheid.”
Suid-Afrika se ou wingerde het ook ’n groot rol gespeel in die aansien wat Chenin blanc deesdae geniet. Die meeste gesertifiseerde ou wingerde (35 jaar en ouer) in Suid-Afrika is Chenin blanc. In die tien wyne wat op die kompetisie bekroon is, het druiwe uit ou wingerde oorheers.
“Ou wingerde het ’n invloed op die kompleksiteit en gehalte van die wyne. Dit het vir ons ’n kaart geskep sodat ons die gehalte kan verstaan, maar ook waar om Chenin blanc te produseer,” meen Pietersen.
Volgens hom is Chenin blanc ook aanpasbaar by die veranderende klimaat en word dit opnuut geplant in die Loire-vallei en ander wynproduserende lande waar die kwik styg.
Die Franse stad Angers het vroeër vanjaar toestemming gegee dat die internasionale Chenin blanc-konferensie in Suid-Afrika mag plaasvind. Dit word van 1 tot 3 November op Stellenbosch gehou en aangebied deur die Académie du Chenin en Destination Angers tesame met die Suid-Afrikaanse Chenin Blanc-vereniging en die Universiteit Stellenbosch.
