Elke oggend pyl kinders van ’n skool op Bredasdorp reguit af op twee vistenks en bekyk wat oornag verander het. Dit is tenks met ’n verskil – met akwaponiese plante wat vir eie gebruik gekweek en vir ’n klein wins verkoop word.
Dit is waarskynlik ook een van die eerste kere in Suid-Afrika dat akwaponika by remediërende onderrig ingesluit word. Hierdie is ’n skool met ’n verskil: Die DS de Wet Skool vir Outisme is in 2017 deur me. Alta de Wet gestig om voorsiening te maak vir die eiesoortige behoeftes van kinders soos haar seun, Daniël.
Die afgelope twee jaar speel ’n klein akwaponikastelsel wat ertjies, aarbeie, blaarslaai, spekboompies en kruie kweek, ’n sentrale rol in hul kurrikulum. Al agt van die skool se leerlinge, wat van 8 tot 12 jaar oud is, is betrokke by die onderhoud van die akwaponikastelsel.
