Mnr. Jacques du Preez, bestuurder vir handel en markte by Hortgro, sê meer as 308 000 werkers en hul afhanklikes is op vrugteplase. Dié syfer neem nie al die ander werksgeleenthede in die waardeketting in ag nie. “Die grootste impak (van die droogte) is op seisoenale werkers met ’n beraamde 22 000 werksgeleenthede wat geraak word.”
Du Preez sê verskeie boere beoefen gemengde boerderye met ’n permanente vrugtegewas en eenjarige groentegewasse. Die waterbeperkings het boere vanjaar laat besluit om eerder die beskikbare water vir permanente gewasse te gebruik, wat ’n verdere ongunstige impak op dié boere se inkomste en gevolglik werksgeleenthede gehad het.
Die afname in oesvolumes plaas druk op die uitvoer- én die plaaslike mark. Die jongste oesskattings dui op ’n daling vergeleke met verlede jaar in die volumes van mid- tot laat pruime, laat nektariens, appels en pere. “Ons is te midde van ’n droogtesiklus. Wanneer die volle potensiaal van die bedryf in aanmerking geneem word, is oesskattings in sommige gevalle tot 25% minder,” sê Du Preez.
Die werklike uitdaging wat waterbeskikbaarheid en vruggroei betref, word gedurende die somer en herfs verwag, wanneer die grootste volumes vrugte oesgereed is.
Onverantwoordelike uitsprake
Die droogte, onverantwoordelike uitsprake deur politici en oningeligte stellings op sosiale media oor watergebruik deur die landbou is ’n bron van kommer vir die organisasie.
“Die landbou in die algemeen, en die vrugtebedryf in die besonder, het die afgelope jare groot vordering gemaak met die uiters doeltreffende aanwending van water deur die gebruik van nuwe tegnologie,” lui ’n verklaring deur Hortgro.
Me. Helen Zille, premier van die Wes-Kaap, het luidens 'n berig op Netwerk24 Maandag 22 Januarie op ’n nuuskonferensie oor die droogte bevestig dat die landboubedryf saamgewerk het om sy waterverbruik in te kort.
Die impak van die droogte is nie net finansieel nie, maar ook sielkundig. Daarom is ongegronde politiekery onverantwoordelik, sê Du Preez.
Wetgewing maak nie daarvoor voorsiening dat vrugteboere van die Regering droogtehulp kan kry nie. Die Land Bank staan wel lenings toe, maar die administrasie en aansoekproses is kompleks en tydrowend. Volgens Du Preez is daar wel belanggegroepe wat saamwerk om humanitêre hulp in sekere streke te verleen.
