Die skool het verlede jaar met die Gen-Z-span begin saamwerk om die projek te koördineer nadat die Junior-landbouvereniging versoek het dat ’n demonstrasiewingerd aangeplant word.
“Die projek by Hoër Landbouskool Boland pas perfek in by die doelstellings van die Gen-Z-wingerdprojek. Ons is trots op ons verbintenis en is opgewonde om te sien hoe hierdie projek waarde vir leerders en produsente in die omgewing gaan ontsluit,” sê mnr. Francois Viljoen, bestuurder van die Gen-Z-wingerdprojek.
Altesaam 21 rooi- en 19 witwyndruifkultivars is by die skool aangeplant, met die doel om te sien hoe hierdie kultivars spesifiek in die Agter-Paarl-terroir sal aard.
Die meeste van die 2 861 wyndruifstokkies bestaan uit tradisionele kultivars, saam met ’n aantal skaars kultivars soos Agiorgitiko, Arinarnoa, Lledoner pelut, Assyrtiko en Piquepoul blanc. Terselfdertyd word ses verskillende prieelstelsels, asook ’n aantal verskillende snoeitegnieke op die proef gestel.
“Dis die eerste skool waar ons so ’n demonstrasiewingerd vestig. Dit gee op ’n vroeë stadium aan leerders blootstelling, nie net aan wingerdkunde in die algemeen nie, maar die verskillende nuanses ten opsigte van druifsoort, terroir en wingerdpraktyke,” sê Viljoen.
Produsente, wingerdboukundiges en ander belanghebbers in die omgewing sal die wingerde kan besigtig tydens demonstrasiesessies.
“Die afskop van die wingerdprojek is vir ons ’n groot mylpaal, wat ons glo die leerervaring vir ons skoliere na ’n nuwe vlak gaan voer,” sê mnr. Kobus Hartman, hoof van die Hoër Landbouskool Boland. “Ons is ook dankbaar vir elke bedryfvennoot wat met ons hande gevat het om hierdie projek moontlik te maak.”
Die vennote wat tot dusver hul dienste, produkte en kundigheid tot die projek bygedra het, sluit in Hauptfleisch Grondverskuiwing, Bergrivier Besproeiing, Die Kooperasie, Vititec Wingerdkwekerye, Voor-Groenberg Kwekery, MK-arbeidskontrakteurs en Windmeul Kelder. “Benewens hul tasbare bydrae sien ons ook daarna uit dat hierdie bedryfsvennote hul kundigheid op lang termyn aan ons leerders gaan oordra,” sê Hartman.
Gen-Z verbind wynprodusente, wingerdboukundiges, verskaffers en navorsers met die nuutste praktyke, tegnologie en hulpmiddels in die wingerd deur kleinskaalse demonstrasiepersele reg oor Suid-Afrika se wyndruifverbouingstreke te vestig.
