Wingerde in die Wes-Kaapse wynlande en die Klein Karoo het goed uitgebot en as weerstoestande gunstig is word ‘n goeie oes verwag, sê kenners.
Mnr. Kobus van Graan, wingerdbouvoorligter vir KWV, sê hy is opgewonde oor die seisoen wat voorlê.
Volgens Van Graan is twee faktore belangrik met die uitbot van ‘n wingerd - die persentasie waarteen die wingerd uitbot en of die onderskeie wingerdplante terselfdetyd bot. “As ons kyk na die Wes-Kaap, spesifiek Stellenbosch, die Paarl, Worcester en Robertson, het die wingerde meestal teen ‘n hoë persentasie en gelyk gebot, wat vooruitsigte baie gunstig maak.”
Reën verhoog risiko van siektes
Van Graan sê hoewel hy bly is oor die reën wat tans sporadies in die betrokke gebiede voorkom, is hy bekommerd oor die invloed daarvan op die risiko van siektes.
“Die reën wat nou val maak nie die grond deurdringend nat nie. Dit maak wel die plante nat, wat die kans vir siektes soos donskimmel verhoog,” verduidelik hy.
Klein Karoo kort reën
Intussen sê mnr. Johannes Merlett, wingerdboukonsultant vir Vinpro in die Klein Karoo, dié streek kort dringend reën vir ‘n goeie oes. “Die wingerde hier het ook mooi gebot. Van die trossies wat al op die plante sit lyk ook goed, maar die gebied het dringend reën nodig vir besproeiing.”
Volgens Merlett word alle wingerde in die Klein Karoo besproei. Hy sê die Montagu-omgewing ondervind nie probleme nie, aangesien hulle water uit die Breederivier kry. “Ladismith, Oudtshoorn en De Rust het egter groot probleme met water.”
Meeste van die damme in dié gebiede se vlakke is baie laag, en mits die gebiede nie binnekort reën kry nie, kan ‘n krisis ontstaan. Merlett sê hy is nie tans bekommerd oor moontlike siektes nie.
1 Oktober 2010
