Alhoewel daar in 2013 ’n nuwe rekord vir wynuitvoere gestel is, is dit kommerwekkend dat die grootste deel van hierdie groei te danke is aan grootmaatwynuitvoere. Wynuitvoere in 2013 het die 2012-rekord met 26% oorskry met ’n totale volume van 525,7 miljoen liter.
Mnr. Phillip Retief, die hoofuitvoerende beampte van Van Loveren, het by Nedbank en VinPro se inligtingsdag gesê dat die mark taamlik in Suid-Afrika se guns was verlede jaar: “Ons het ’n rekordoes gehad in ’n jaar wat daar ’n produksietekort was in Europa. Ongelukkig het die tekort in Europa nie tot beter pryse vir grootmaatwyne gelei nie.”
Die realiteit is egter dat Suid-Afrika se grootmaatwyn tans die goedkoopste ter wêreld is. Volgens die Ciatti-wynprys indeks van 2013 het Suid-Afrikaanse grootmaat-witwyne vir die goedkoopste verhandel teen 51 Amerikaanse sent per liter en grootmaat-rooiwyne vir die tweede goedkoopste teen 71 Amerikaanse sent per liter.
Retief blameer die die gesegmenteerde aard van die Suid-Afrikaanse wynbedryf vir die situasie: “Ons is 'n relatiewe klein bedryf vergeleke met van hierdie ander wêreldspelers, so dit behoort teoreties vir ons maklik te wees om saam beter pryse vir ons wyne te beding.”
Nuwe neiging
Verlede jaar se rekordoes het ook bygedra tot die groot wynpoel verlede jaar. Verder is daar ’n nuwe neiging van Europa om meer grootmaatwyn in te voer om sy eie bedryf te bou en werk te skep.
Aan die positiewe kant het die pryse vir Suid-Afrikaanse grootmaatwyne relatief stabiel gebly teenoor pryse vir grootmaatwyne van Australië, Chili, Frankryk en Spanje, meen Stephen Rannekleiv van Rabobank. Hy het bygevoeg dat Spanje nou met ’n groot inventaris sit waarvan hulle ontslae moet raak en dit kan die wêreld se grootmaatwynpryse afdruk.
Mike Veseth, wynredakteur van The Wine Economist, voel dat die Suid-Afrikaanse bedryf nie te bekommerd moet wees oor die situasie nie: “Die grootmaatwynmark en die verpakte mark is twee verskillende markte. Om grootmaatwynverkope af te stoot gaan nie noodwendig lei tot meer verkope in die verpakte mark nie.”
Die grootmaatwynmark moet egter nie die beeld van die bedryf skade doen nie, want dit kan 'n negatiewe impak op pryse van verpakte wyn hê. “Julle wil nie in dieselfde bootjie as Australië wees wat te veel wyn produseer en dan elke jaar met laer pryse tevrede moet wees nie. Die bedryf moet dus volumes bestuur en seker maak dat dit 'n duidelike handelsmerk aan die wêreld kommunikeer wat met goeie gehalte verbind word."
