Hortgro, verteenwoordiger van die
Suid-Afrikaanse kern- en steenvrugbedryf, is nie bewus van enige vars
produkte wat “vrot geword” en “weggeggooi” moes word soos die naweek in Rapport
berig is nie, maar kan bevestig dat daar kwessies by Kaapstad-hawe is wat tot
probleme met gehalte lei, sê mnr. Anton Rabe, uitvoerende direkteur van
Hortgro.
Volgens hom beïnvloed probleme by die hawe die raklewe van vrugte en dit plaas bemarkingsprogramme in die algemeen onder druk.
Rapport het berig dat R1 miljard se uitvoervrugte weens probleme by Kaapstad-hawe nie hierdie seisoen hul markte in die Noordelike Halfrond sal bereik nie.
Dié bedrag is verkry uit ’n vooruitskatting deur Hortgro wat alle moontlike probleme waarmee die bedryf by Kaapstad-hawe gekonfronteer kan word, soos onder meer wind en mis, globale druk en ekstra koste, in ag geneem het en voorspel het dat ’n verlies van R1 miljard met die uitvoer van kern- en steenvrugte moontlik is.
Hortgro het verskeie stappe gedoen om verligting vir die sagtevrugtebedryf te bring. Die organisasie vergader weekliks met belanghebbendes oor kwessies soos vertragings en die beskikbaarheid van vraghouers. Daar word reeds planne beraam om te verseker dat die nodige infrastruktuur en onderhoud by die hawens gereed is. Daar is ook ’n proses begin om alle belangegroepe byeen te bring sodat voorstelle ter tafel gelê kan word.
