Deur embriotiese wortel- en lootweefsel afkomstig uit saad as basis te gebruik, het Britse wetenskaplikes dit vir die eerste keer reggekry om twee spesies eensaadlobbige, grasagtige plante te versmelt en saam te ent.
Só kan hulle voordelige eienskappe, soos siekteweerstandigheid of hitteverdraagsaamheid, van een grasagtige plantsoort na ’n ander oordra. Dit is tot dusver getoets op piesangs, uie, die tequila-agaveplant en dadelpalms, en dit lyk belowend vir koring en rys.
Die navorsing is gedoen deur die Cambridge-universiteit en die resultate het in die vaktydskrif Nature verskyn. Die enting van eensaadlobbige grasagtige plante was tot dusver ’n tameletjie, aangesien hul stamme nie ’n spesifieke soort weefsel, vaskulêre kambium, bevat wat die tegniek tipies moontlik maak nie.
