Dié bedrag is die eerste betaling ingevolge ’n ooreenkoms wat in 2019 gesluit is om hierdie twee tradisionele gemeenskappe in staat te stel om voordeel te trek uit die kommersialisering van rooibos.
Luidens ’n verklaring deur die Suid-Afrikaanse Rooibosraad is ’n deeglike administratiewe proses gevolg voor die betaling gemaak is.
Suid-Afrika vereis dat almal wat handel dryf met inheemse, biologiese bronne, soos rooibos, die voordele daarvan op ’n regverdige manier met tradisionele kennishouers moet deel. Onderhandelinge vir die bogenoemde ooreenkoms het in 2014 begin toe die Suid-Afrikaanse regering die Khoi en San as die regmatige tradisionele kennishouers van rooibos erken het.
Volgens die raad is die ooreenkoms enig in sy soort aangesien dit tussen ’n hele bedryf – pleks van spesifieke maatskappye – en tradisionele kennishouers gesluit is. Dit verseker dat ’n heffing van 1,5% volgens ’n enkele proses betaalbaar is op alle rooibos wat verkoop word. Dié heffing sal jaarliks in ’n trust betaal word.
Die aanwending van die geld sal deur die nasionale KhoiSan-raad en Suid-Afrikaanse San-raad bepaal word. Die primêre doel van die geld is om hierdie gemeenskappe op te hef. ’n Jaarlikse verslag met besonderhede oor die toewysing van die geld sal jaarliks aan die departement van bosbou, visserye en omgewingsake verskaf word om deursigtigheid te verseker.
Mnr. Martin Bergh, voorsitter van die Suid-Afrikaanse Rooibosraad, sê die doel van die geld is om by te dra tot die verligting van armoede en die bewaring van voedselsekerheid.
