Die eerste van vier wynoesskattings deur wingerdboukundiges en produsentekelders dui op ’n effens kleiner, dog goeie wynoes vir 2023. Vinpro het die oesskatting gister in ’n verklaring aangekondig.
“In hierdie baie vroeë stadium word die netto afname in die skatting hoofsaaklik toegeskryf aan ’n droër seisoen in al die groeistreke, behalwe vir die Noord-Kaap wat moeilike omgewingstoestande tydens en ná die oes gehad het,” sê mnr. Conrad Schutte, bestuurder van Vinpro se span wingerdboukundiges wat verantwoordelik is vir die oesskattings met die samewerking van die Suid-Afrikaanse wynbedryfinligting- en stelsels (Sawis). “Swak blom en set in verskeie gebiede, saam met die uitkap van wingerde, het bygedra tot die afname in die skatting vir die 2023-oes.”
Me. Wanda Augustyn, Vinpro se kommunikasiebesturder, sê dat wingerde hoofsaaklik tans uitgekap word omdat hulle te oud word om goeie opbrengste te lewer. “Daar word tans meer wingerde uitgekap as wat aangeplant word,” sê sy. “Die hoeveelheid hektare is besig om te krimp. Dit is een van die redes waarom die oes kleiner geskat word.”
Ná die covid-19-pandemie sukkel baie wynprodusente steeds met kontantvloei. Gevolglik word minder belê in die vestiging van nuwe wingerde, aldus Augustyn.
Buiten die wingerde wat uitgekap word, is nog ’n rede vir die kleiner wynoesskattings die laer gemiddelde reënval wat korrelgroottes beïnvloed. Die Noord-Kaap het egter die teenoorgestelde probleem gehad aangesien wingerdstokke as gevolg van ongewoon baie reën op ’n minimale reserwestatus gebot en dus minder trosse gevorm het. “Blare het ook swak gegroei en in sommige gevalle selfs tydelik opgehou groei,” lui die verklaring.
Verder laat beurtkrag sy merk op die bedryf. Dit ontwrig besproeiingskedules in gebiede soos die Klein-Karoo en Robertson, wat intensiewe besproeiing vereis.
Augustyn sê hierdie vooruitskatting is nog nie kommerwekkend nie. Hoewel daar nog baie faktore is wat die oesgrootte voor oestyd kan beïnvloed, is die verskil minimaal kleiner as dit wat vanjaar geoes is.
Sy voeg by dat dit ook sover blyk asof die oes van goeie gehalte gaan wees.
“Die seisoen lyk belowend, maar baie kan verander voor die pars begin,” sê Schutte in die verklaring.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
