Plaaslike lietsjieliefhebbers gaan die komende seisoen baat by die Suid-Afrikaanse Lietsjie Kwekersvereniging (SALKV) se landswye program om die kwaliteit van vroeëseisoenlietsjies te verbeter.
Pryse vroeg in die seisoen is gewoonlik baie hoog, wat kwekers in die versoeking stel om onvolwasse lietsjies te pluk wat nie soet of sappig is nie. Volgens SALKV betaal verbruikers baie vir sulke vrugte, wat gepaard gaan met 'n slegte eetervaring, 'n seker resep wat verbruikers ontmoedig om later in die seisoen weer vars lietsjies te koop.
Gevolglik het die SALKV 'n "Quality Approved"-embleem ontwikkel wat deelnemende pakhuise op lietsjiepalette van lietsjies wat vars en gesond is, en 'n minimum deursnee van 28mm het, sal plak. Lietsjies kleiner as 28mm word as onvolwasse beskou en sal nie soet of sappig wees nie.
Inligtingsblaadjies sal aan kopers en agente op varsproduktemarkte uitgedeel word wat hulle sal inlig dat lietsjies wat die SALKV se "Quality Approved"-embleem vertoon wel soet en sappig is. Dié proses sal nie net die kopers ontmoedig om onvolwasse lietsjies te koop nie, maar ook kwekers ontmoedig om onvolwasse vrugte mark toe te stuur.
Ad-hoc inspeksies sal deur SALKV gedoen word om te verseker dat lietsjies wat wel die SALGA "Quality Approved"-embleem dra aan die vereistes voldoen.
Kontak mnr. Theo Bekker van Subtrop by 015 306 6240 vir meer inligting.
28 Oktober 2008
