Die Hantam-rooibosteefabriek, wat die Noord-Kaapse provinsiale regering in 2009 op Nieuwoudtville tot stand gebring het, is al langer as twee jaar in sakeredding. Op Vrydag 9 September het die sakeredder ’n aansoek om likwidasie by die hooggeregshof in Kimberley ingedien.
Palm sê hierdie wending is ’n groot verlies vir die gemeenskappe in die Hantam-munisipaliteit, wat uit Calvinia, Loeriesfontein, Middelpos en Nieuwoudtville bestaan, aangesien dié fabriek een van die mees gesofistikeerde fabrieke in sy soort is en boonop van die begin af groot potensiaal vir uitvoer getoon het.
“Die VF Plus plaas die skuld vir die sluiting van die fabriek voor die deur van die plaaslike regering wat nie bereid was om ’n vennootskap met private beleggers aan te gaan om die nodige bestuursvaardighede en kundigheid te verskaf nie.
“Hierdie situasie plaas verdere druk op die plaaslike rooibosteebedryf en die gemeenskappe wat daarvan afhanklik is. Die werkloosheid in Nieuwoudtville en omliggende gebiede gaan hierdeur vererger word.”
Palm sê die VF Plus doen ’n beroep op die provinsiale regering in die Noord-Kaap om private beleggers te nader om tot die redding van die fabriek te kom en ’n verdere insinking in die ekonomie van die Hantam te voorkom.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
