Dié goeie nuus kom uit die derde Vintelligence-verslag oor wynverbruik in Suid-Afrika. “Gehalte en leefstyl hou mense lojaal,” staan geskryf in die Great BIG Wine Survey oor die studie wat aanlyn van 26 Augustus tot 18 Oktober onder 7 447 deelnemers gedoen is.
Vroulike verbruikers (60% teenoor 40% mans) sorg vir die grootste verteenwoordiging onder die wyndrinkende bevolking van Suid-Afrika en verkies veral om wyn te drink as hul uiteet, by die huis ontspan of by ’n geleentheid by hul eie of vriende se huise. Hoewel mans soortgelyke voorkeure het, blyk dit uit die studie dat mans meer geneig is om by sekere sosiale geleenthede oor te skakel na bier.
Blootstelling aan wyn
Die nuutste verslag bevestig vorige bevindings van die 2021-verslag wat uitgelig het dat Suid-Afrikaanse verbruikers se blootstelling aan wyn nie gelyk is nie. “Baie verbruikers word steeds eers op ’n baie latere lewensfase aan wyn blootgestel. En al is heelwat werk reeds gedoen om sommige stigmas oor wyn uit die weg te ruim, lê daar nog ’n baie lang pad voor om wyn te bevorder,” luidens die verslag.
Hierdie soort struikelblokke skep egter geleenthede, want dit is ook tekenend dat die Suid-Afrikaanse mark vir wyn nog ver van versadig af is.
Wat pla mense van wyn?
Dis volgens die skrywers van die studie duidelik dat heelwat mense bekommerd is oor die gevolge en uitwerking wanneer hulle té veel wyn drink. Wyndrinkers in KwaZula-Natal, Limpopo en Noordwes is veral bekommerd oor die gevolge soos hoofpyne en babbelas, wat inskop nadat ’n mens te veel wyn gedrink het.
Hoewel hierdie sienswyse ’n groot probleem vir die wynbedryf skep, hou dit ook geleenthede vir innovasie in deur byvoorbeeld produkte met laer alkoholinhoud te vervaardig en kleiner verpakkings te oorweeg.
Dit gaan veral oor die smaak van wyn
Smaak is steeds die belangrikste faktor wat verbruikers se aankope dryf, gevolg deur bekendheid met die wynplaas of vervaardiger (wat ook op die handelsmerk kan dui) en derdens die kultivar van die wyn.
Die beste prys!
Waarde vir geld kraai koning as die belangrikste faktor waaroor verbruikers wonder wanneer hulle wel wyn aankoop.
Wat dié ideale prysklas egter is, hang af waar ’n verbruiker trek in sy of haar reis met wyn.
Die gewilde prysklas vir aanlyn aankope is tussen R100 en R200, met meer wyn wat bo R200 gekoop word as produkte onder R80. Die teenoorgestelde is egter die geval wanneer mense wyn in winkels koop waar die gemaklike prys onder R80 is.
Aanlyn winkels al hoe gewilder
Dit blyk aanlyn wyninkopies word die nuwe normaal met 69% meer verbruikers wat reeds aanlyn koop as vorige studies. Die meeste van diegene wat nog nie aanlyn inkope probeer het nie, oorweeg dit wel.
’n Besoek aan winkels om wyn te koop, bly egter steeds die gewildste, mits die ervaring gerieflik is en die meeste mense wat hul wyn self in winkels koop, geniet daarvan nog op dieselfde dag van aankope.
Meng die name
Die geleentheid om ’n mengsel van verskillende wyne in ’n pakket aan te bied, is baie gewild onder aanlyn aankopers, veral as die pakkette boonop byvoorbeeld saamgestel is volgens temas, kultivars en toekennings.
Volgens die verslag bied hierdie voorkeur óók geleenthede omdat verskillende handelsmerke wat so saamgevoeg word, aan verbruikers die geleentheid gee om hul voorkeure uit te toets.
Soet of droog?
Nuwer wyndrinkers – gemeet aan waar hulle hulself op hul reis met wyn bevind – verkies soeter wyne. Die Wes-Kaap is egter die uitsondering as dit kom by die keuse tussen soet en droog. Dié provinsie is die enigste een waar verbruikers beduidend droë wyne bo soeter produkte kies.
Die studie waarsku daarteen om net aan te neem dit is meestal jonger wyndrinkers wat soeter wyne verkies, “want soos die reis vorder, groei die voorkeur na droëer wyne”, luidens die studie.
Gewildste verpakking
Die gewildste verpakking bly die 750 ml-glasbottel, hoewel alternatiewe soos bokswyne se gewildheid steeds toeneem. Dis veral die nuwer verbruikers wat onlangs ’n smaak vir wyn begin ontwikkel het, wat nie vasskop teen ander alternatiewe van glas nie en daarom selfs wyn in blikkies sal aankoop.
Die studie het ook gevind mense reageer al hoe meer gunstig teenoor sintetiese kurkproppe pleks van skroefproppe. Die meeste deelnemers verkies egter steeds dat hul wyn met natuurlike kurk geseël word.
