Maleisië is nie net ’n aansienlike mark vir Suid-Afrikaanse vars produkte nie, dis ook goed geleë om Suid-Afrikaanse landbouprodusente vinnige toegang tot markte in die Verre Ooste en China te bied. Só sê mnr. Abbas Bilgrami van die Maleisiese logistieke maatskappy Mutiara Perlis, wat besig is om die Perlis Food Hub en Perlis-korridor van die kus deur die Maleisiese binneland tot in China te bou.
Bilgrami het tydens die onlangse Fresh Connections-vergadering van die internasionale varsprodukte-agentskap IFPA gesê die Maleisiese mark neem reeds 3% van Suid-Afrika se varsproduk-uitvoer op en dat die mark na verwagting met 6,64% per jaar groei. Dit is die tweede grootste invoerder van Suid-Afrikaanse kernvrugte.
Hy het gesê die mark hou ook groot potensiaal in vir sitrus en ander hoëwaardelandbouprodukte soos swartbessies, vye, kersies en, buite seisoen, sagtevrugte. Daar is ook groeipotensiaal in die mark vir groente en vleis – spesifiek lams- en beesvleis. Maleisië voer tans kool, aartappels en uie in groot maat van China af in, maar hy meen Suid-Afrikaanse produsente moet dit oorweeg om hierdie produkte na Maleisië uit te voer.
Boonop, het Bilgrami gesê, is Maleisië goed geleë as verspreidingspunt vir Suid-Afrikaanse landbouprodukte na die Verre Ooste, die wêreld se grootste mark vir vars produkte met sy 1,7 miljard verbruikers.
“Die mark en korridor wat ons bou, sal teen 2023 in bedryf wees en kan Suid-Afrikaanse produkte vinniger by bestemmings soos Thailand, die Chinese binneland, Indonesië en Mianmar kry. Dit kan die reistyd met tot vyf dae verkort.”
Hy sê tariewe van die nuwe hawe by die monding van die Straat van Malakka gaan minder as dié van mededingende hawens wees met moderne hanteringstoerusting wat vragte gemaklik tussen see-, lug-, spoor- en padvervoer oorskakel.
By die Perlis Food Hub sal produkte, waar nodig, herverpak kan word om aan plaaslike regulasies en markvereistes te voldoen.
Bilgrami het gesê sy maatskappy hoop om met Suid-Afrikaanse produsente saam te werk en vennootskappe te vorm vir die lewering en verspreiding van vars produkte.
Vir nog inligting kan hy by 076 459 5875 of abbas@mutiaraperlis.com gekontak word.
