Dieselfde wyn, maar uit die 1968-oesjaar, is vir R28 000 per bottel verkoop. Die GS Cabernets het by verre die hoogste pryse van enige Suid-Afrikaanse wyne op die veiling behaal.
“Ons is in die wolke! Dit wys hoeveel vertroue daar in hierdie wyne is, veral as ’n mens in ag neem dat die openingsbod R25 000 per bottel was,” sê mnr. Michael van Deventer, kurator van die ondergrondse Tabernakel-wynbiblioteek op Stellenbosch, wat die wyne verkoop het, in ’n verklaring.
Die Tabernakel het ’n hand vol historiese wyne beskikbaar gestel om onder die hamer te kom. Die geld uit die verkope sal gebruik word vir ’n projek om wyle Duimpie Bayly, die bekende wynpersoonlikheid wat verlede jaar aan ’n hartaanval oorlede is, te vereer.
Gehul in misterie
Die hoë prys wat die GS Cabernets behaal het, is deels te danke aan voorste wynkritici soos Jancis Robinson wat al by geleentheid volpunte aan dié 1966-wyn toegeken het. Daar is egter ook talle legendes oor die ontstaan van dié kultuswyn, wat moontlik die voorletters van George Spies dra. Spies was ’n danser, perderuiter en selfgeleerde wynmaker wat druiwe uit Durbanville gekoop het. Volgens gerugte het hy die wyn sonder sy base by Stellenbosch Boerewynmakery se toestemming gemaak. Daar is ook diegene wat glo die wyn is eintlik deur Phil Walker op die Durbanville-plaas Morgenster gemaak en aan Monis verkoop.
“Maar ons weet nie verseker nie. Nie eens sy dogter het sy verhouding met die wyn bevestig nie. Almal stem egter saam dis ’n toonbeeld van ’n uitstekende rooiwyn met langlewendheid,” sê Van Deventer.
Daar is ook stories dat Spies – ás hy die wyn gemaak het – dit gedoen het op dieselfde manier as wat witwyn gewoonlik gemaak word en dat dit baie min tyd op die doppe deurgebring het.
“Vir die eerste twintig jaar was die wyn geheel en al ondrinkbaar. Met verloop van tyd het dit egter ’n merkwaardige varsheid en karakter ontwikkel.”
Ander Suid-Afrikaanse wyne wat vir groot geld opgeveil is, is Chateau Libertas uit die 1940- en 1959-oesjare. Dit is vir R20 000 per bottel verkoop. Die Nederburg Auction Reserve Cabernet Sauvignon 1974 is vir R11 000 per bottel verkoop en Zonnebloem Cabernet Sauvignon 1963 het vir R14 000 onder die hamer gekom.
Ter ere van Duimpie
Bayly het sedert 1962 by Distell gewerk, waar die einste Spies ’n ruk lank sy baas was. Hy was later ’n direkteur van Stellenbosch Boerewynmakery en toe Distell. Hy het in Distell se direksie gedien tot met sy aftrede in 2013.
Bayly het ’n belangrike rol gespeel in die totstandkoming van die Tabernakel in 1979. Die idee was om die beste van die beste daar te berg, sodat Distell dit kon gebruik om sy eie wyne teen internasionale sterre te meet.
Meer inligting oor die projek ter ere van Bayly sal binnekort bekend gemaak word.
Die Tabernakel huisves sowat 12 000 van Suid-Afrika se grootste wynskatte en word beskou as ’n waardevolle historiese, wynboukundige en kulturele hulpbron. Onder die kosbare wyne tel twee halwe bottels Constantia-wyne uit 1821 en verskeie wyne uit die 1920’s.
