Die eerste “Vindaba” word volgende jaar in Kaapstad aangebied om wyntoerisme in Suid-Afrika te bevorder.
Luidens ’n verklaring het rolspelers in die wyn- en toerisme-bedryf koppe bymekaar gesit om dié indaba aan te bied as deel van die nasionale toerismesektorstrategie. Dít sal die eerste uitstalling in die land wees wat aan wyntoerisme gewy word.
Die inisiatief geniet die steun van die nasionale en provinsiale regering, terwyl mnr. Marthinus van Schalkwyk, Minister van Toerisme, dié bedryf as een van die wêreldtoerismemark se winsgewendste sektore beskryf.
Die Vindaba gaan al die aspekte van Suid-Afrika se wynverwante toerisme uitstal, met die fokus op wyn-, reis- en leefstylmedia, wanneer dit in September volgende jaar by die Kaapse Konferensiesentrum aangebied word. Die Vindaba sal in dieselfde tyd as Cape Wines 2012 plaasvind.
Lees ook: Wynbedryf is sleutel in toerismesektor
’n Vennootskap
Die Vindaba is ’n vennootskap tussen Wines of South Africa (Wosa), SA Toerisme, verskillende wynroetes, Kaapse Toerisme, Kaapse Roetes Onbeperk en die Wes-Kaapse Departement van Finansies, Toerisme en Ekonomiese Ontwikkeling.
Me. Su Birch, hoof uitvoerende bestuurder van Wosa, sê ’n natuurlike sinergie bestaan tussen die Vindaba en die Cape Wineland 2012-uitstalling, wat elke tweede jaar deur Wosa aangebied word.
“Benewens die feit dat baie produsente aan al twee uitstallings gaan deelneem, is daar ook ander raakpunte. Suid-Afrika bou geleidelik aan ’n binnelandse en globale bewustheid van die omvang en uitnemendheid van sy wyne, en word nou as ’n beduidende, wynproduserende land beskou.
"Herkoms speel ’n strategiese rol in wynbemarking, en daarom maak dit sin om wynverwante toerisme te bevorder. Daarom word wynliefhebbers daadwerklik aangemoedig om die tuiste van die produkte wat hulle so geniet, te gaan besoek,” verduidelik Birch.
Lees ook: Wyntoerisme onder oë
15 Julie 2011
