Suid-Afrikaanse wingerdkundiges neem gewoonlik aan dat elke soort mikroskopiese myt onafhanklik is van mekaar en verskillende soorte simptome veroorsaak in die knoppe of op die blare van druifplante wanneer hulle plaagbeheerprogramme beplan.
Maar ’n studie wat onlangs in die joernaal Diversity gepubliseer is, het dié aanname verkeerd bewys.
“Produsente het altyd aanvaar dat daar een soort myt is wat knopsimptome soos knoppieblaargalle veroorsaak en ander wat weer simptome soos krulblaar veroorsaak,” sê dr. Davina Saccaggi, hoofskrywer van die Diversity-artikel. “Daarom het hulle tipies dit apart hanteer asof dit deur verskillende lyne veroorsaak word.
“Ons genetiese studies wys egter dat hoewel ’n mens verskillende spesies myte kry, elkeen geensins beperk is tot spesifieke dele van die wingerd nie. Jy kan elke spesie regoor die plant kry ? almal gelyktydig.“As jy dus net spuit weens knopmytsimptome, maar tekens van myte op die blare ignoreer, sal dieselfde myte net weer in die volgende seisoen in die ogies verskyn.”Saccaggi was tydens die loop van die jarelange navorsingsprojek verbonde aan die departement landbou, grondhervorming en landelike ontwikkeling se plantgesondheid diagnostiese dienste, en is nou by Citrus Research International.Groot skade
Die myt Colomerus vitis is ’n pes wat in wingerde wêreldwyd voorkom. Teen tussen 0,1 en 0.2 mm in grootte is volwasse knopmyte eenvoudig té klein om met die blote oog gesien te word.
Hul eiers en larwes is selfs kleiner.
Saccaggi sê hul bevindinge hou praktiese implikasies in vir hoe produsente op wingerdmyt-infestasies reageer.
“Gewoonlik tree hulle eers op wanneer simptome sigbaar is weens skade wat die myte in die rustende ogies aangerig het. Dit kan lei tot misvormde lote, blare en trosse en selfs tot vernietigde ogies. Dit kan ’n ekonomiese impak op die volgende oes hê,” sê sy. Dr. Ellenorah Allsopp van die landbounavorsingsraad Infruitec-Nietvoorbij en medewerker aan die studie, sê die skade word aangerig as myte in rustende ogies voed. Die simptome is dan sigbaar sodra die ogies begin bot.
“Die verskillende simptome is almal rooi vlae vir dieselfde probleem. Produsente moet dit dus daarvolgens hanteer totdat navorsers meer hieroor uitgevind het,” reken dr. Barbara van Asch van die US departement genetika, wat ook deel van die studie was.Sy sê hul genetiese studies het gewys dat daar minstens vyf spesies van die wingerdmyt wêreldwyd is en dat drie van hulle in Suid-Afrikaanse wingerde voorkom. Al drie soorte myte is versamel regoor die wingerdplant. “Mens kan dus nie ’n spesifieke wingerdsimptoom toeskryf aan net een enkele spesie nie.”Van Asch sê dis moontlik dat verdere studies sal wys dat daar selfs meer spesies te vinde is elders ter wêreld.
