Appel- en peerboere in die Langkloof kan nie meer die kans waag om hul oeste aan hael bloot te stel sonder nette nie. Die voordele wat daarmee gepaard gaan, maak dit uit en uit die moeite werd. Ná 15 jaar waarin die Giraffe-boerdery nette aanwend om sy appels en pere te beskerm, oorskry die voordele enige nadele verreweg.
“Vir die bietjie ekstra arbeid kan jy dit enige tyd doen, want as jy die som maak, gaan dit met ’n plus eindig,” sê mnr. Denné Strydom, senior bestuurder van dié boerdery by Krakeelrivier, naby Joubertina in die Langkloof in die Oos-Kaap.
Hy meen alle nuut geplante bome in die Langkloof sal in die toekoms onder struktuurnette wees. Die Giraffe-boerdery bestaan al meer as ’n eeu in die Langkloof en is in die besit van een van die talle Strydoms in dié gebied, mnr. Dewald Strydom.
