Die plaaslike wynbedryf bevind homself by ’n kruispad met die kleinste druiwe-oes in meer as ’n dekade die afgelope seisoen. Die SA Wynbedryfinligting en -stelsels (Sawis) het in April gesê dit is die kleinste totale oes sedert 2005. Verlede jaar het wynboere meer as 1,4 miljoen ton druiwe ingesamel. Vanjaar se oes is sowat 20% kleiner.
Volgens mnr. Francois Viljoen, bestuurder van Vinpro se wingerdbou-adviesdiens, kan die klein oes toegeskryf word aan ’n daling in aanplantings en ’n toename in wingerde wat uitgehaal word, die droogte, rypskade en verwagte laer saponttrekkings uit kleiner korrels.
In Oktober het mnr. Eben Sadie, bekroonde wynmaker en eienaar van Sadie Family Wines, gewaarsku dat 30% prysstygings nodig is om die plaaslike wynbedryf te red. Hy het gesê die bedryf is by breekpunt, tensy boere R12 000 per ton vir druiwe betaal word.
