Die vonk vir die wyn was die wynmaker Jean Smit en sy vennoot, David Curl, se geesdrif vir onontdekte en onbesonge stukkies Suid-Afrikaanse terroir. Curl het voorheen Château Gaby in Canon-Fronsac in Bordeaux besit. Smit en Curl is oortuig daarvan dat wonderlike wyn in die wingerd begin.
“Damascene gaan daaroor om onvergeetlike wingerd en terreine uit te soek wat waarlik wys watter ongelooflike diversiteit van terroir ons in die Wes-Kaap het. Ek bring dae en duisende kilometer op die pad deur om wingerd en boere te gaan besoek in my soeke na spesiale pakkies grond,” vertel Smit.
Hy is gek is daarna om met sy snoeiskêr in die hand sy-aan-sy met wingerdspanne te werk sodat hy werklik ’n gevoel vir die wingerd se terroir kan kry. Hy koop tans druiwe van meer as 20 verskillende plekke in die Wes-Kaap. Hy het sy wynmaaktande onder meer by Rustenberg en Boekenhoutskloof geslyp, maar dit was tydens sy oorsese werksreise, onder meer in Nieu-Seeland, die Napa-vallei en die Rhône-streek, dat hy werklik geleer het wat dit beteken om ’n verbintenis met ’n wingerd op te bou.
