Die beoordeling van die jaarlikse SA Olyftoekennings het op 23 en 24 September in die Paarl plaasgevind en die kompetisie het vanjaar met sowat 200% meer inskrywings as verlede jaar gespog. Die onafhanklike beoordelaars het inderdaad hulle hande vol gehad om die wenners te kies.
Die kompetisie word vanjaar vir die derde keer aangebied en wenners kan met trofeë vir die beste ekstra suiwer olyfolie en die beste tafelolywe wegstap. Daar is ook verskeie goue en silwer medaljes op die spel en 'n kategorie vir gedroogde olywe verskaf 'n nuwe dimensie.
Suid-Afrika se olyfpresteerder van die jaar kan uit enige gebied in die bedryf kom. Me. Linda Costa, die sameroepster van die toekennings, sê "dit wil voorkom asof die 2008-olies sagter as gewoonlik is weens die nat herfs wat ons beleef het. Die verbruiker kan werklik uitsien na 'n heerlike nuwe rondte olies. Ons is bevoorreg om olyfolies van wêreldgehalte te geniet - en dit teen 'n fraksie van die prys wat ons vir soortgelyke kwaliteit in enige ander land sou opdok. Ons besondere ekstra suiwer olyfolies is 'n besliste gunsteling by olyfolie-smulpape regoor die wêreld".
Die wenners van die kompetisie sal op 8 Oktober by die Laborie Landgoed bekendgemaak word.
Kontak me. Costa by 021 884 4655 vir meer inligting, of stuur 'n e-pos na info@olivesgonewild.co.za. Jy kan ook www.saolive.co.za besoek.
30 September 2008
