Dit gaan tans
baie goed met rooibosteeboere, met rekordpryse wat die afgelope twee jaar behaal
is. Die bedryf bied tans aan boere ’n gulde geleentheid om hul gebrek aan
beheer oor hul eie produk sowel as die mate waarin hulle prysnemers is, aan te pak.
Só het mnr. Willem Engelbrecht, rooibosteeboer van die Groenkol-rooibosteelandgoed naby Clanwilliam, op Khoisan Tee se boeredag aan medeboere gesê.
“Ons boere moet
besef ons werk met ’n nie-bederfbare produk, en ons moet dit tot ons voordeel
gebruik. Bou ’n skuur op jou plaas en boer jou skuur vol. Bemark dan volgens
die kontantvloeibehoefte van jou boerdery. Ek is self ’n verwerker en doen
kontrakverwerking vir ander boere. As boere nie die voordeel van ’n
nie-bederfbare produk gebruik nie, gaan diegene met opbergplek dit wel
gebruik,” het Engelbrecht, wat ’n aandeelhouer in Elandsberg Tea Processors is,
aan die boere gesê.
Die prys van onverwerkte rooibostee is tans die hoogste nóg en bykans tien keer hoër as wat dit slegs ses jaar gelede was. Boere verdien tans tot R65/kg vir onverwerkte tee, terwyl dié prys in 2010 minder as R5/kg was. Hoë voorraadvlakke van 2007 tot 2011 het die lae prys tot gevolg gehad. Gevolglik is baie min tee aangeplant. Nadat die droogte produksie geknou het, het voorraadvlakke tot baie laag gedaal, wat tot hoër pryse gelei het.
Hoewel daar geen amptelike bedryfsyfers is nie omdat daar nie meer ’n bedryfsliggaam vir boere bestaan nie, word daar in die bedryf beweer dat heelwat meer tee vanjaar aangeplant is as in vorige jare. Heelwat meer rooibostee kan glo in 2020 verwag word. Engelbrecht het boere aangemoedig om die huidige goeie tyd te gebruik om hul boerderye te diversifiseer indien moontlik.
“Sorg bowenal dat jy weet waar jou boerdery se gelykspeelprys per kilogram geproduseerde tee is. Moenie jou tee teen minder as daardie punt verkoop nie. Die enigste manier om dit te verseker, is om die nie-bederfbaarheid van die produk tot jou guns aan te wend en ’n voorraad in ’n skuur op jou plaas op te bou in die jare waarin daar ’n surplus is en die prys laag is.”
Engelbrecht meen dat die premieprys wat deesdae vir organiese tee betaal word, dit die moeite werd maak om ’n organiese produksiestelsel te oorweeg.
Mnr. Martin Slabbert, hoofbestuurder van Khoisan Tee, stem met hom saam. Hy het boere aangemoedig om te sorg dat hul produk van die hoogste moontlike gehalte is. “In die tye waarin daar ’n tekort aan tee is, sal verwerkers hul oë toeknyp en tee van ’n swakker gehalte aanvaar. In tye waarin daar ’n goeie aanbod is, sal swak gehalte nie aanvaar word nie.”
Engelbrecht het boere aangemoedig om verhoudings met meer as een verwerker op te bou en betrokke te raak in die bedryf, juis omdat bedryfsinligting nie vrylik beskikbaar is nie. Dit bemoeilik besluitneming. “Hoe meer jy in die bedryf betrokke is, hoe makliker gaan jy ’n aanvoeling kry van wat in die bedryf gebeur.”
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
