Volgens die bevindinge van dié opname, ’n gerekende barometer van wat vir Suid-Afrika se jeug modieus en begeerlik is, is rooibostee kort op die hakke van Starbucks-koffie. Dit het ander gunstelinge soos Nescafé, Milo, Nestlé Hot Chocolate en Hug-in-a-mug uitgestof.
Meer as 6 000 Suid-Afrikaanse jong mense tussen die ouderdom van 8 en 23, asook jong professionele mense tussen die ouderdom van 25 en 30 is gevra om hul gunstelingprodukte en -handelsmerke in 69 kategorieë te benoem.
Die kategorie vir warm drankies is verlede jaar vir die eerste keer in die opname ingesluit. Verlede jaar was twee swarttee-handelsmerke onder die toptien, maar vanjaar was rooibos die enigste kruie-aftreksel of teeproduk op die lys.
Vanjaar se gewildste drankies is:
1. Starbucks-koffie
2. Rooibos
3. Nescafé
4. Milo
5. Ricoffy
6. Jacobs Kroning-koffie
7. Nestlé Hot Chocolate
8. Nestlé Cappuccino
9. Hug-in-a-mug
10. KFC se warm drankies
Sowat 14 000 ton rooibos word jaarliks in in die Cederberg-streek in die Wes-Kaap verbou – die enigste plek ter wêreld waar dit geproduseer word. Die helfte daarvan word plaaslik verbruik, terwyl die res na 30 lande reg oor die wêreld uitgevoer word.
Me. Adele du Toit, woordvoerder van die SA Rooibosraad, sê luidens ’n verklaring die toekenning is besonder spesiaal gegewe die groot verskeidenheid drankies waaruit vandag se jeug kan kies. “Rooibos kom tot sy reg. Dit het ontwikkel van ’n eenvoudige kruideniersware-item tot ’n produk wat verbruikers wil hê.
“Deel van sy aantrekkingskrag is sy veelsydigheid. Dit kan warm of koud geniet word, as ’n cappuccino, espresso, skemerkelkie/mocktail, energiedrankie, smoothie of borreltee en kom in meer as 100 verskillende versnitte voor. Dit maak dit pret en opwindend vir avontuurlustige jeugdiges om mee te eksperimenteer.
“Die jeug word meer gesondheidsbewus met baie wat funksionele voedsel- en drankaankope bo soet drankies en verwerkte voedsel verkies. Rooibostee is kafeïenvry, laag in tanniene en vol antioksidante, wat almal se gesondheid bevorder,” sê Du Toit.
Sosiale media is volgens haar ook daarvoor te danke dat rooibostee so gewild is.
“Sosiale netwerke het die manier waarop ons eet en drink verander. Dit dryf neigings en gedrag aan, veral onder millenniërs en Gen Z,” sê Du Toit. “Die jeug van vandag is meer ingelig oor produkte as enige ander generasie. Hulle doen navorsing, vra meer vrae en is meer besorg oor wat hulle in hul liggame sit en hoe produkte die omgewing beïnvloed. Rooibos merk al hierdie boksies.”
