Van Ryn se 20 jaar oue potketel-brandewyn is tydens die internasionale brandewyntoekennings (aangebied deur The Drinks Report) as die wêreld se beste brandewyn (gemaak van wyn) aangewys.
Om dié gesogte eerbewys in te palm, is die brandewyn blind geproe en volgens ’n streng telkaartstelsel beoordeel. Die beoordelaars het gekyk na balans, karakter, kompleksiteit en gehalte.
Volgens me. Marlene Bester, Van Ryn se meester-versnyer, is dié toekenning die hoogste eerbewys wat ’n stokery te beurt kan val.
“Hierdie 20 jaar oue brandewyn is tydloos en groots. Die brandewyn vang die tradisie van handgemaakte, outentieke potketel-brandewyn vas. Dis ’n tradisie wat ons vandag nog voortsit.”
Die bekroonde brandewyn is ryk en dekadent, met geure soos vanielje, speserye en rooswater.
Dis gemaak van Chenin blanc- en Colombar-basiswyn wat destyds in koper-potketels verstook is. Een van dié ketels is meer as 200 jaar oud en word steeds daagliks gebruik. Slegs die “hart”, die suiwer vloeistof wat opgevang is ná die eerste verstoking, is vir die brandewyn gebruik. Dis ’n tweede keer gestook en daarna laat verouder.
“Dis tydens die verouderingsproses dat die brandewyn lewendig raak. Die uitgesoekte eikevate gee karakter aan die kleurlose spiritus wat van die potketels af kom, namate die pragtige goue skakerings en gekonsentreerde geure oor 20 jaar ontwikkel,” lui ’n mediaverklaring.
Ander Suid-Afrikaanse brandewyne wat geskitter het by die toekennings, is KWV se 20 jaar oue brandewyn, Van Ryn se 15 jaar oue brandewyn en KWV se 15 en 12 jaar oue brandewyne. Hulle is onderskeidelik met goue, silwer en brons toekennings beloon. Richelieu het die kategorie vir solera-brandewyn gewen.
