Mnr. Cyril Julius van die Departement van Landbou se direktoraat Plantgesondheid en Gehalte in Pretoria sê die Japannese owerheid het 'n dringende ondersoek gelas nadat Imazalil-vlakke van 7,8 dele per miljoen op 9 Augustus en 23 Oktober op pomelo's uit Suid-Afrika gekry is. Japan laat nie meer as 5 dele per miljoen Imazalil vir ingevoerde pomelo's toe nie. Hierdie middel word gewoonlik as ná-oesbehandeling in die pakhuis toegedien.
Volgens mnr. Julius lyk dit asof die probleem in net een pakhuis ontstaan het.
Die Japannese owerheid het onmiddellik Tokio se Metropolitan Government (Japan se beheerliggaam vir invoerders) opdrag gegee om die saak deeglik te ondersoek. Voortaan sal alle pomelo's uit Suid-Afrika nagegaan word. Hierdie intensiewer ondersoeke sal moontlik na alle sitrus uit Suid-Afrika uitgebrei word. Verkopers van hierdie besendings pomelo's is dringend gelas om die vrugte aan die mark te onttrek.
Die direktoraat Plantgesondheid en Gehalte het sy eie ondersoek geloods en het die Japannese owerheid versoek om meer besonderhede bekend te maak. "Ons wil byvoorbeeld graag weet hoe die monsters geneem is en hoe verteenwoordigend die monsters was."
Die Suid-Afrikaanse sitrusbedryf het 'n uitstekende reputasie as 'n verantwoordelike verskaffer van goeie vrugte aan die wêreld. Voorvalle soos hierdie het dus die potensiaal om Suid-Afrika se goeie reputasie in die buiteland te skaad. Die onus rus vierkantig op die skouers van die produsente en die uitvoerders om te verseker dat hul produkte ten volle aan die vereistes van die betrokke invoerlande voldoen, sê mnr. Julius.
Mnr. Edward Vorster, voorsitter van Sitrus Suid-Afrika, sê mense moet teen 'n oorreaksie waak. Om die situasie in perspektief te sien, moet onthou word dat 3,6 miljoen tot 3,7 miljoen kartonne pomelo's per jaar na Japan uitgevoer word en dat die hoë residuvlakke van Imazalil, wat nie 'n verbode middel is nie, slegs met twee inspeksies gevind is. Meer inligting is reeds aangevra oor die toetsmetodes wat in Japan gevolg word, en plaaslike navorsers glo dit is 'n baie onwaarskynlike toeval dat die betrokke residu-vlakke bykans ses weke uitmekaar presies dieselfde kon wees.
Die oorsprong van die pomelo's is bekend en die betrokke produsent en pakhuis sal aan streng monitering onderwerp word. 'n Dringende beroep word op sitrusprodusente gedoen om by die regulasies en protokol te hou ten einde Suid-Afrika se reputasie as 'n verskaffer van heilsame sitrusvrugte verder uit te bou en nie af te breek nie, het mnr. Vorster gesê.
22 November 2002
