Luidens ’n verklaring het verteenwoordigers van die Suid-Afrikaanse ambassade in China, die Wes-Kaapse regering en die toonaangewende Chinese varsvrugte-invoerder Goodfarmer die geleentheid Vrydag (24 Maart) bygewoon.
Volgens Sati is tafeldruiwe lank reeds ’n gunstelingvrug in China en is verbruikers gretig om nuwe kultivars in nuwe vorms en kleure te proe.
Sati wil China voorsien van vars tafeldruiwe van ’n hoë gehalte. Dit is ’n bederfbare produk en moet binne ’n relatief kort tydsbestek aan die mark gelewer en verbruik word. Sati wil in China se markbehoeftes voorsien deur ’n toegespitste benadering met korter vervoertye en ’n nouer aankomstydgleuf.
Gedurende die afgelope twee seisoene was die gewildste kultivars wat na China uitgevoer is, Crimson Seedless, Autumn Crisp, Sweet Globe en Sweet Joy. Tafeldruifkultivars wat in China in gewildheid toeneem, word toenemend in Suid-Afrika aangeplant, wat die weg baan vir verdere groei van plaaslike tafeldruiwe op die Chinese mark in die komende jare.
“Ons is verheug om ons veldtog hierdie seisoen uit te brei en voort te gaan om verhoudings met die vrugtebedryf in China te bou,” het AJ Griesel, uitvoerende hoof van Sati, gesê. “Die opheffing van covid-19-beheermaatreëls in China beteken dat ons weer persoonlike geleenthede met handelaars kan hou, soos die bekendstellingsgeleentheid in Guangzhou. Dit beteken ook die terugkeer van winkelpromosies vir verbruikers.
“Suid-Afrika tafeldruiwe word in baie lande reg oor die wêreld bemark, insluitend die Europese Unie, Brittanje, Amerika en Kanada,” het Molatelo Mamadi, landbouraadgewer by die Suid-Afrikaanse ambassade in Beijing gesê. “Suid-Afrika voer al etlike jare tafeldruiwe na China uit. Dit is gewild danksy die goeie gehalte en soet smaak.”
Die 2022-’23-tafeldruifseisoen is amper verby en tot dusver het die bedryf 61,3 miljoen kartonhouers (4,5 kg-ekwivalent) oftewel 275 850 ton tafeldruiwe uitgevoer. Teen die einde van die seisoen word verwag dat Suid-Afrika ongeveer 63 miljoen kartonhouers (4,5 kg-ekwivalent) oftewel 283 500 ton sou uitvoer.
Griesel moedig meer mense aan om Suid-Afrikaanse tafeldruiwe te ervaar. “Suid-Afrika sien daarna uit om bedryfsafgevaardigdes van reg oor die wêreld te huisves op die 10de internasionale tafeldruifsimposium wat van 26 November tot 1 Desember 2023 plaasvind.”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
