Vir die eerste keer sedert Concours Mondial du Sauvignon se ontstaan 14 jaar gelede sal dié kompetisie op Suid-Afrikaanse bodem plaasvind. Dit sal die eerste keer wees dat die kompetisie buite Europa plaasvind.
“Die keuse van gasheerland vind nie lukraak plaas nie. Die organiseerders kies markte wat groei toon in beide produksie en die verbruik van hierdie wyn,” sê mnr. Quentin Havaux, direkteur van Concours Mondial du Sauvignon, in Sauvignon Blanc SA se onlangse verklaring. “Ná 14 jaar in Europa was Suid-Afrika ons eerste keuse as gasheerstreek – danksy die dinamiese rol wat Suid-Afrika in die produksie van Sauvignon blanc speel.”
Luidens ’n verklaring is Suid-Afrika 15de op die wêreldranglys wat grootste wingerde betref en voer die land die sesde meeste wyn ter wêreld uit. Verder is Sauvignon blanc die land se topverkoper en dit is die kultivar wat die meeste uitgevoer word.
“Meer Suid-Afrikaanse produsente moet hierdie geleentheid op eie bodem aangryp en inskryf,” sê mnr. RJ Botha, voorsitter van Sauvignon Blanc SA.
“Die Concours Mondial du Sauvignon is ’n waardevolle en onontbeerlike hulpmiddel vir Sauvignon blanc-produsente. Dit bied groot internasionale blootstelling, dit dien as ’n internasionale bemarkings- en verkoopsinstrument, dit onderskryf die wenwyne met ’n seël van goedkeuring en dit is ’n betroubare koopaanwysing vir die verbruiker.”
Mnr. Philip van Zyl, redakteur van die jaarlikse Platter’s-wyngids, meen die feit dat Suid-Afrika as gasheer gekies is, dui daarop dat die plaaslike wynbedryf al hoe meer op internasionale vlak erkenning kry.
“Tien jaar gelede sou dit ondenkbaar gewees het, want Suid-Afrika se profiel was net nie van so aard dat dit sou gebeur het nie,” sê Van Zyl. “Dinge het vinnig heelwat verander en dit is nog ’n goeie voorbeeld van hoe die plaaslike wyne en wynkultuur, en die mense in die bedryf ernstig opgeneem word. Dit is uiteraard fantasties.”
Wat behels die kompetiesie?
Luidens Sauvignon Blanc SA se verklaring sal die kompetisie van 13 tot 17 Maart in Franschhoek in die Kaapse Wynland plaasvind. “Altesaam 35 internasionale beoordelaars word vir vyf dae in Franschhoek onthaal met proesessies oor drie dae, asook uitstappies na Sauvignon blanc-gebiede soos Durbanville en Constantia,” lui die verklaring.
Die proepaneel sal bestaan uit internasionale uitgesoekte spesialiste, asook wynkopers, -skrywers en spesialis-kritici. “Sowat twintig nasionaliteite word in die paneel verteenwoordig en verseker sodoende die uitstaande diversiteit wat die Concours Mondial du Sauvignon onderskei van enige ander wynkompetisie reg oor die wêreld.”
Daar sal aan die beste inskrywings goue en silwer medaljes toegeken word. Verder is daar ook spesiale trofeë vir die inskrywings wat die beste tellings in die volgende kategorieë behaal: droë ongehoute wyn, droë houtverouderde wyn, ongehoute versnitte (ten minste 51% Sauvignon blanc) en houtverouderde versnitte (ten minste 51% Sauvignon blanc).
“Benewens die gebruiklike puntestelsel uit 100 sal elke wyn ook ’n gehaltebeoordeling ontvang wat gegrond is op proekommentaar deur die paneel kundiges,” sê Havaux. “Só verseker ons produsente van Sauvignon blanc van groter deursigtigheid en bied hulle nuwe geleenthede om hul wyne te bemark.”
Die inskrywings sluit op 17 Februarie 2023 en alle wynmonsters moet teen 21 Februarie 2023 afgelewer word. Die resultate sal op 20 Maart 2023 by Prowein in Düsseldorf, Duitsland, bekend gemaak word.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
