Luidens ’n verklaring deur die Suid-Afrikaanse tafeldruifbedryf (Sati) sal vanjaar se oes sowat 18% kleiner as die vorige oes wees en sowat 11% kleiner as wat aanvanklik geskat is.
Sati het in Desember verlede jaar aangedui hy verwag dat sowat 71,7 miljoen kartonhouers (4,5 kg-ekwivalent) in die huidige oesjaar uitgevoer sou word. Dié skatting is intussen hersien en Sati verwag nou dat ongeveer 63,6 miljoen kartonhouers vir uitvoer geïnspekteer sal word.
Luidens die verklaring kan die kleiner oes hoofsaaklik toegeskryf word aan kleiner oeste wat tot dusver in die Hexrivier-streek gepak is, asook laer opbrengste wat vir oorblywende kultivars in die streek verwag word. Die oesskatting vir hierdie streek is dus aangepas na 20,64 miljoen kartonhouers. Dit verteenwoordig ’n vermindering van 3,33 miljoen kartonhouers, of 13,9% vergeleke met die vorige skatting.
Volgens die jongste syfers vir die Oranjerivier-streek en noordelike streke, waar die seisoen reeds afgesluit het, is onderskeidelik 16,4 miljoen en 5,6 miljoen kartonhouers gepak. Die huidige oesskattings vir die Olifantsrivier-streek (3 miljoen kartonhouers) en die Bergrivier-streek (17,9 miljoen kartonhouers) bly onveranderd.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
