Die sitrusbedryf is aan die vooraand van die nuwe sitrusuitvoerseisoen bekommerd oor die uitwerking van die oorlog tussen Rusland en Oekraïne op die logistieke ketting en betaalskedules.
“Ons het reeds met uitvoerders in verbinding getree wat bewus is van die huidige risiko’s. Hulle sal dit bestuur en hul kommersiële besluite daarop grond, en alternatiewe opsies oorweeg as die risiko toeneem,” sê mnr. Justin Chadwick, besturende direkteur van die Suid-Afrikaanse Sitruskwekersvereniging (SKV).
“Die SKV sal aanhou om die situasie dop te hou en om in verbinding te bly met belanghebbendes reg oor die waardeketting om die impak van die konflik in Oekraïne in die komende seisoen te verminder.”
Volgens die SKV word die uitvoer van Suid-Afrikaanse sitrus nog nie ernstig geraak deur die konflik nie, aangesien groot volumes sitrus nog nie in produksie is nie.
“Indien dit egter nie moontlik sal wees om sitrus na die streek te kan uitvoer wanneer die 2022-seisoen in volle gang is nie, sal vrugte bestem vir Rusland in ander markte beland. Dit kan lei tot ’n ooraanbod en gevolglike laer pryse.”
Rusland is tans die vyfde grootste uitvoerbestemming vir Suid-Afrikaanse sitrus, met ongeveer 11,2 miljoen kartonhouers (15 kg) wat daarheen uitgevoer word.
Suid-Afrika voer 8% van sy vars vrugte uit na Rusland.
Verskeie skeepsvaartrederye het al aangekondig dat hulle hul dienste na Rusland en Belarus opskort. Dit sluit onder meer Maersk, MSC, CMA-CGM, Hapag-Lloyd en One in. Van die skeepsvaartrederye het egter aangedui dat hulle noodsaaklike goedere, soos voedsel en humanitêre goedere, sal vervoer.
