Suid-Afrikaanse olies is uit die boonste rakke as dit kom by gehalte, waarde vir geld en eerlike etikettering.
Dit is bevind in ’n studie van SA Olive waarin verskeie plaaslike én internasionale olyfolies wat in Suid-Afrika beskikbaar is, ondersoek is.
Suiwerheid
Die doel van dié navorsing was om die gehalte van plaaslike sowel as ingevoerde ekstra suiwer olyfolies te bepaal.
“Die groot motivering vir hierdie studie was om die Suid-Afrikaanse verbruiker op die hoogte te bring van die werklike gehalte van beskikbare olyfolies,” verduidelik mnr. Leonard Arangies, bestuurder van die SAO, in ’n verklaring.
“Die waarheid is dat nie alle olies wat byvoorbeeld as ekstra suiwer geëtiketteer is, wel ekstra suiwer is nie. Veral van die ingevoerde olies wat getoets is, het skokkende afwykings getoon,” sê Leonard.
Getoets
’n Ewekansige monster is van die beskikbare olyfolies geneem en in ’n geakkrediteerde internasionale laboratorium volgens die International Olive Council (IOC) se spesifikasies getoets.
Sewe Suid-Afrikaanse en 23 ingevoerde olies is aan die studie onderwerp. Slegs 23% van die monsters wat getoets is, was Suid-Afrikaans aangesien sowat 80% van plaaslik beskikbare olyfolies ingevoer word.
Die resultate dui aan dat ingevoerde olies persentasiegewys van ’n swakker gehalte as hul Suid-Afrikaanse eweknieë is. Geen van die plaaslike olies wat getoets is, het enige aanduiding getoon dat daarmee gepeuter is nie, terwyl 26% van die ingevoerde olies misleidend as ekstra suiwer gebottel is.
Net 22% van ingevoerde olies het die toets as ekstra suiwer olyfolie geslaag, terwyl 71% van die Suid-Afrikaanse olies hierdie status verdien.
Billike pryse
“’n Verdere interessante waarneming wat na vore gekom het, is die kwessie van prys,” sê Arangies. “Die Suid-Afrikaanse verbruiker het dikwels die indruk dat plaaslike olyfolies van gehalte te duur is om te koop.
"Die studie het egter getoon die gemiddelde prys van alle olyfolies wat getoets is, beloop R62,68 vir 500 ml, terwyl die gemiddelde prys vir dié wat werklik as ekstra suiwer geklassifiseer mag word, R65,19 vir dieselfde volume kos – ’n klein verskil vir van die beste olyfolies ter wêreld.”
Verbruikers moet uitkyk vir die simbool Member of SA Olive Commitment to Compliance Scheme (CTC). Produkte wat hierdie simbool van geloofwaardigheid dra, bevestig daarmee dat die inhoud 100% plaaslik vervaardig is volgens die SA Olive Gedrags- en Praktykkode gegrond op internasionele standaarde en dat dit korrek geëtiketteer is.
26 Julie 2011
