Rio Largo het vanjaar twee van net ses dubbelgoue medaljes by die SA Olive-toekennings verower.
Dit is die tweede jaar in ’n ry dat dié olieprodusent dubbelgoud losslaan.
Die SA Olive-toekennings het vanjaar die meeste inskrywings sedert die ontstaan van die kompetisie gelok. Behalwe vir die ses dubbelgoue-medaljes, het 16 goue medaljes, 11 silwermedaljes en 12 bronsmedaljes ook huis gekry.
Rio Largo se Extra Virgin Olive Oil Cold Extracted en Mild (altwee in die medium-kategorie) het die dubbelgoue medaljes gewen. ’n Goue medalje is ook aan die Rio Largo Freedom of the Press toegeken.
Mnr. Nick en mev. Brenda Wilkinson van Rio Largo naby Worcester boer met sowat 30 ha olywe wat alles met die hand gepluk en op die plaas verwerk word. Die Wilkinsons het ook hul eie olyfkwekery en beoog om binne die volgende vier jaar nog 40 ha olyfbome te vestig.
Neffens die Breërivier
Die plaas is op die regteroewer van die Breërivier geleë. Die droë somers en lae humiditeitsvlakke skep die ideale rypwordingsvlakke vir hul olywe. Die bome staan in sanderige grond met alluviale neerslae en kleiagtige ondergrond. Met ’n gemiddelde reënval van sowat 200 mm per jaar, is dit nodig om regdeur die jaar te besproei.
Rio Largo is egter nie die enigste Worcester-plaas wat by die toekennings gepresteer het nie. Mnr. Andries Rabie van Willow Creek in die Nuy-vallei is as die Olyfpresteerder van die Jaar aangewys. Hy het ook ’n goue medalje vir die Director’s Reserve-olie (intense kategorie) gewen.
Rabie het in 1999 sy eerste olyfbome geplant. Die boerdery het uitgebrei en vandag maak hy olyfolie van 173 000 bome op 280 ha. Hy het ook sy eie olyfkwekery op die been gebring en reeds ses nuwe kultivars van hoofsaaklik Israel af ingevoer. Sy olyfolie het al 29 plaaslike en internasionale toekennings gewen.
Rabie was ses jaar lank die voorsitter van die bedryfsorganisasie SA Olive.
Die ander dubbelgoud-wenners is River Bend (medium), Adamskloof (intens), Bakenshoogte (intens) en De Boerin (intens).
Kyk hier na 'n fotosamestelling van die beoordelingsproses.
5 September 2011
