Mnr. Pierre van Zyl, plaasbestuurder van WK Beukes Boerdery en mnr. Pieter de Kock, plaasbestuurder van AS Viljoen & Seuns Boerdery, is hierdie jaar se wenners in die Hexriviervalleise Tafeldruifvereniging se jaarlikse blokkompetisie. Van Zyl het die afdeling vir gevestigde blokke gewen en De Kock die afdeling vir jongblokke.
Van Zyl skryf sy sukses met die blok Sable-druiwe toe aan tydige optrede: “Met druiwe kan jy nie wag nie, as daar ’n probleem is moet dit dadelik aangespreek word.”
Dit was ook hoe Van Zyl dit reggekry het om verliese weens reën en haelskade te beperk: Vroue is in die wingerde ingestuur om vrot en gebarste korrels uit te pluk voordat dit na ander korrels kon versprei.
De Kok se raad is om die regte kultivar met die regte onderstok op die regte grond te plant. “Ons het in die wenblok Crimson Seedless op Ramsey-onderstokke gehad. Ramsey-onderstokke werk goed vir ons, want ons grond is baie sand- en klipperig en die Ramsey-onderstokke help om groei te gee.” Hy het bygevoeg dat plantmateriaal van ’n betroubare kweekery gekry moet word.
Verder stem hy saam met Van Zyl dat jy jou hand op die blok hou. De Kock-hulle gebruik mikrobesproeiing in die blok. Hy verduidelik dat hulle al vir jare mikro’s gebruik, omdat dit vir hulle goeie resultate gee: “Die mikro's versprei water oor ’n wyer area sodat wingerde onder mikro’s ’n wyer wortelstelsel het as wingerd onder drupbesproeiing. Die resultaat is stokke wat ’n bietjie meer stres kan hanteer as stokke onder drupbesproeiing,” verduidelik hy.
Vroeë kultivars ly wel skade
Daar is hierdie jaar tien jongblokke en 19 gevestigde blokke in die blokkompetisie ingeskryf. Mnr. Johan Hugo, bestuurder van die varsprodukte-uitvoerdersforum (PPECB) en die hoofbeoordelaar in die kompetisie, sê dat die hael en ontydige reën vroeër die seisoen skade veroorsaak het aan van die vroeë kultivars nadat inskrywings gemaak is. Die res van die druiwe lyk egter baie goed.
Hy het bygevoeg dat daar baie nuwe kultivars op die mark is en dat die kompetisie ’n goeie geleentheid is vir produsente om produksiepraktyke met mekaar te vergelyk.
Ander presteerders in die gevestigde blokafdeling was: Mnr. J.J. le Roux van De Vlei Boerdery met ’n blok Sweet Celebration (tweede) en mnr. W.J. van Wyk van die plaas Hylton met ’n blok Crimson Seedless (derde). In die jongblok-afdeling het mnr. Robert Brown van Kanetvlei met ’n blok Magenta tweede gekom en mnr. Deon Meissenheimer van die plaas Vreesniet het met ’n blok Crimson Seedless derde gekom.
Byskrif: Toppresteerders in die jongblokkompetisie: Mnre. Deon Meissenheimer van Vreesniet van AS Viljoen & Seuns Boerdery (derde plek), Jan Engelbreght en Robert Brown van Kanetvlei wat aan Mnr. De Wet Conradie behoort (tweede plek) en Pieter de Kock van Boplaas wat aan AS Viljoen & Seuns Boerdery behoort (wenner).
Byskrif: Onder is die wenners van die gevestigde blokafdeling. Van links is mnre. Hannes du Toit, bestuurder van WK Beukes Boerdery, Jacques le Roux van Cornerstone Nursery wat een van die borge was, Pierre van Zyl, plaasbestuurder en wenner van WK Beukes Boerdery en Wouter Beukes, die eienaar van WK Beukes Boerdery.
