Hoewel Suid-Afrika se lietsjieprodusentedie afgelope seisoen goeie pryse op veral die uitvoermark verdien het, is die laaste twee seisoene deur lae opbrengste gekenmerk.
Mnr. Derek Donkin, hoofbestuurder van Subtrop, die oorkoepelende kwekersvereniging vir die avokado-, lietsjie-, mango- en makadamianeutbedrywe, sê die 2013/14-oes was dié bedryf se tweede agtereenvolgende klein oes. Terwyl lietsjieprodusente van Malelane en Komatipoort in Mpumalanga wél 'n redelike oes gehad het, was die produsente in die Tzaneen- en Soutpansberggebiede van Limpopo minder gelukkig weens die swak opbrengssyfers wat behaal is.
Die oesgrootte vir die 2013/14-seisoen was 1,12 miljoen kartonne teenoor die 1,1 miljoen kartonne wat in die 2012/13-seisoen en die 1,8 miljoen kartonne wat in die 2011/12-seisoen behaal is.
“Die plaaslike vraag na lietsjies is goed met goeie gepaardgaande pryse. Die produsente wat die regte kultivars vroeg in die seisoen kan uitvoer voordat Madagaskar die Europese mark betree, verdien goeie geld,” sê Donkin.
Weersomstandighede vanaf April en tydens blom, vrugset en voreë vrugontwikkeling het 'n groot invloed op die oesgrootte. Goeie verbouingspraktyke soos die korrekte bemesting, besproeiing en die beheer van vegetatiewe groeistuwings is ook faktore wat die oesgrootte beïnvloed. In hierdie stadium is dit nog te vroeg om 'n voorspelling oor die 2014/15-oes te maak omdat die bome eers in Augustus en September blom.
“Die lietsiemark word beïnvloed deur die beskikbare volume, maar goeie gehalte vrugte en die regte kultivar vir 'n spesifieke teikenmark speel ook 'n besliste rol,” reken Donkin.
