“Die oes word op hierdie stadium kleiner voorspel as die oes wat in 2022 by kelders ingeneem is. Wynmakers en wingerdboukundiges is egter eenstemmig – die goeie gehalte van die druiwe hou groot belofte in vir die maak van uitstekende wyn,” sê mnr. Conrad Schutte, bestuurder van Vinpro se span wingerdboukundiges wat die oesskattings saam met die Suid-Afrikaanse wynbedryfsinligting en -stelsels (Sawis) uitreik.
Luidens ’n verklaring deur Vinpro is die aanloop tot vanjaar se seisoen gekenmerk deur ’n warm en droë winter wat meestal warmer as normaalweg oor al die wynproduserende streke was. Die reënval was egter noemenswaardig minder, buiten vir die Noord-Kaap.
“Die bot was vroeër en egaligheid was bevredigend. Sterk groeikrag aangedryf deur optimale fotosintese, tesame met die droër grond, het set in sekere areas nadelig beïnvloed. Veral Colombar en Cabernet sauvignon se trosse kom losser voor in hierdie stadium.
“Harde reënbuie gedurende die eerste week van Desember het groot verligting gebring in die meestal warm en droë seisoen. Hierdie welkome reën het druk op besproeiingskedulering verlig, maar het ook swamsiektedruk, veral witroes en donsskimmel, verhoog.”
Die drie vorige oesskattings het aangedui dat alle streke behalwe die Klein-Karoo se oes kleiner as verlede jaar s’n sal wees. Volgens die nuutste oesskatting sal die oes in alle streke kleiner wees.
Beurtkrag se impak
Verskeie probleme het volgens Vinpro tot die kleiner oes gelei, onder meer beurtkrag wat intensiewe besproeiingsgebiede se pompe sonder krag laat het.
“Dít, tesame met die droë winter en lente lei tot kleiner korrelgroottes met ’n laer oesgewig. Die later kultivars soos Cabernet sauvignon en Colombar word tans gepars en soos die trosse geweeg word, word die effek van swak setomstandighede gesien met ligter trosgewigte.”
Wingerduitkappings in veral die Noord-Kaap, Olifantsrivier en Swartland het die totale area onder wyndruiwe laat krimp. Reën gedurende die rypwordingsperiode, veral die harde reën van die eerste en tweede week van Maart, het tot verdere probleme gelei.
“Die klimaat gedurende die volgende paar weke is van deurslaggewende belang en kan steeds die oesgrootte beïnvloed,” sê Schutte. “Dit is nou belangrik om vrugsones oordeelkundig oop te maak sodat lug- en ligbeweging optimaal plaasvind gedurende hierdie moeilike omstandighede met hoë siektedruk.”
Die vyfde oesskatting vir wyndruiwe word in Mei uitgereik.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
