“Die verkoop van onvolwasse avokado’s, met ander woorde vrugte wat te vroeg gepluk en nie behoorlik ryp word nie, is nou verbode in terme van van die Wet op Landbouprodukstandaarde,” sê mnr. Derek Donkin, hoofbestuurder van Subtrop, die oorkoepelende kwekersvereniging vir die avokado-, lietsjie-, makadamianeut- en mangobedrywe.
Volgens Donkin gaan inspekteurs van die Departement van Landbou, Bosbou en Visserye (DAFF) avokado-volwassenheid reeds van vroeg in die nuwe seisoen op die markte begin toets. Indien enige onvolwasse avokado’s gevind word, sal die verkoop van sulke vrugte verbied word.
In die verlede is onvolwasse avokado’s wat deur die inspekteurs gevind is, afgegradeer na ‘laagste graad’, maar dit kon nog steeds verkoop word. Vanjaar (2014) sal die verkoop van onvolwasse vrugte verbied word.
Avokado-produsente word aangeraai om seker te maak dat hulle vrugte voldoen aan die vereiste volwassenheidstandaard voordat dit gepluk word.
Vir die kultivar Fuerte moet die vrug se voginhoud 80% of minder wees. Betroubare avokado-pakhuise is almal in staat om die vereiste volwassenheidstoetse uit te voer. Inspekteurs sal avokado-volwassenheid op die nasionale varsproduktemarkte monitor en daarom moet produsente seker maak dat hulle vrugte aan die nodige vereistes voldoen voordat hulle oes en sodoende nie die risiko loop dat die verkoop van hulle vrugte verbied word nie.
Vir meer inligting oor die volwassenheidsbepaling van avokado’s kan Subtrop gekontak word by tel. 015 307 3676.
