Meyer sê dat bottelnekke in onder meer hawens die volhoubaarheid van handel in belangrike landbouprodukte bedreig. Die voortslepende oorlog tussen Rusland en Oekraïne het ook ’n groot toename in die pryse van onder meer kunsmis en graan veroorsaak.
“Ten spyte van hierdie probleme beur die landbou voort, soos bewys deur die onlangse oesskattings vir verskeie gewasse.”
Volgens die sagtevrugtebedryfsorganisasie Hortgro sal appel- en peeruitvoer vanjaar met onderskeidelik 6% en 12% toeneem. Nektarienuitvoer sal na verwagting met 26% toeneem. Die uitvoer van perskes sal met slegs 2% toeneem, maar produksie daarvan in Ceres en Bergrivier het met onderskeidelik 7% en 10% toegeneem.
Graan SA voorspel dat koringproduksie in die Wes-Kaap vanjaar met 4% of 41 900 ton sal toeneem danksy goeie reënval wat die gebied onder produksie met 34 000 ha kan laat toeneem.
