KWV is aangewys as die mees gerespekteerde handelsmerk in Afrika en die Midde-Ooste. Hy word gevolg deur Kanonkop (43ste plek), Nederburg (45ste) en Bruce Jack (49ste).
Die voorste posisie wêreldwyd word vanjaar deur Antinori in Italië ingeneem. Dis die eerste keer dat ’n Italiaanse wynkelder boaan dié lys pryk. Dit word die afgelope 13 jaar deur Drinks International opgestel.
“Dit bly die mees gesaghebbende lys van gerespekteerde kelders van reg oor die wêreld. ’n Akademie van wynmeesters, sommeliers, wynkopers, joernaliste en bedryfskundiges van ses vastelande stem jaarliks vir die 50 op die lys. Dis ’n groot prestasie om ’n plek op die lys te beklee,” sê Shay Waterworth, Drinks International se redakteur.
Die akademie stem volgens drie kriteria, naamlik gehalte en bestendigheid, die verhouding tussen prys en gehalte, en die sterkte van bemarking en handelsmerke.
KWV, wat 38ste op die lys lê, is twee plekke hoër geplaas as Château Mouton Rothschild, een van Bordeaux se voorste landgoedere.
“Om saam met die mees gerespekteerde wynhandelsmerke ter wêreld geplaas te word, dui op die respek wat ons handelmerk verdien het onder plaaslike en internasionale verbruikers,” sê Liandra Kotzé, uitvoerende wynbemarker by KWV.
John Loomes, KWV se uitvoerende hoof, sê aangesien hul druiwe van verskeie wingerde reg oor die land af kom, gee die toekenning ook erkenning aan die skoonheid en gehalte van die wynland. “Die wêreldverhoog neem kennis daarvan.”
Dit is die sesde keer dat Nederburg op die gesogte lys verskyn. Volgens Kate Jackson, Nederburg se hoofbestuurder, dui die verkoopsfrekwensie van Baronne, hul gewilde rooiwyn, daarop dat daar gemiddeld elke 15 sekondes ’n bottel daarvan in Suid-Afrika oopgemaak word. Nederburg word in meer as 75 lande verkoop.
“Om die lys te haal is ’n groot eer, maar dis veral ’n groot prestasie vir ons in hierdie tyd van verhoogde internasionale mededinging,” sê Jackson.
Sy sê tawwe markte en logistieke terugslae weens geopolitieke konflik en infrastruktuurprobleme soos ’n oorvol hawe het sake verder bemoeilik die afgelope jaar.
“Ons hou net aan om te doen waarmee ons die beste is, en dit is om uitnemendheid by alle pryspunte te lewer. Dis danksy ons voortdurende beleggings in wingerdproduksie en wynbereidingsvaardighede. Ons klem op herlewingslandbou, watervoogdyskap en beskerming van ’n netwerk van wynprodusente het ook gehelp in ons strewe na gehalte.”Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
