Die erfenisklone is op 1 Augustus, ’n datum wat die stigting van die Ou Wingerd-projek (OWP) in 2016 gedenk, bekend gestel. Die OWP was die eerste projek in sy soort ter wêreld en Suid-Afrika geniet erkenning vir een van bekendste ou wingerd-kategorieë ter wêreld.
Die OWP en Vititec het saamgewerk om individuele wingerdstokke uit te soek in verskillende blokke van die beste ou wingerde in die Wes-Kaap. Die materiaal is toe met hitte-terapie in laboratoriums gesuiwer om van virusse ontslae te raak.
Me. Rosa Kruger, onafhanklike wingerdboukundige en die moeder van die OWP, sê dis noodsaaklik om die klone te suiwer, want veral die rolblaarvirus het ’n invloed op die opbrengs en gehalte van druiwe.
“As ons skoon materiaal van ons oudste wingerde plant en ons boer op ’n manier dat dit skoon bly, het ons die kans om plantmateriaal aan die bedryf te verskaf wat uitstekende wyne in die toekoms kan maak,” glo sy.
Volgens mnr. André Morgenthal, bestuurder van die OWP, is dit ’n lang proses. Die virusvrye plante sal op ’n hektaar grond op die plaas Pietersklip op Die Berg naby Clanwilliam geplant word. Die Ferreira-familie van Red T Company boer daar met rooibostee.
Kruger beskryf Pietersklip as ’n uitsonderlike terrein.
“Dis nie ver van Skurfberg nie, waar die eerste ou wingerdstokke wat deel was van die OWP meer as 15 jaar gelede opgespoor is en waarvan talle voorste wynmakers nou wyn maak. Die grond hier is fantasties en dis naby die see geleë, met ’n heerlike koel luggie wat hier trek.”
Dié organiese plaas is ook afgeleë, met geen wingerde wat vir kilometers daar naby groei nie. Dit verlaag die kans dat virusse van ander wingerde na die erfenisstokke oorgedra kan word.
Kruger sê die idee is om so na as moontlik aan die natuur te plant. “Ons wil nie die natuur oorheers nie, maar dit eerder navolg.”
Die wingerde sal deurentyd geïnspekteer word. Die idee is om wynboere in staat te stel om wingerde te plant met die vermoë om ouwingerd-status (minimum 35 jaar) te bereik.
“Die filosofie is om wingerde te plant wat sal aanhou om druiwe van uitstekende gehalte te lewer namate die wingerd ouer word,” sê Morgenthal.
Die OWP het tans 130 lede wat jaarliks gesamentlik meer as 250 wyne uit gesertifiseerde ou wingerde maak. Dié wyne dra die Ou Wingerd-seël, wat alom deur verbruikers as ’n teken van gehalte beskou word.
