Hoe het jy by die wynbedryf betrokke geraak?
Trizanne: Nadat ek aan die Universiteit Stellenbosch in wingerd- en wynbou gegradueer het, het ek in Australië, Frankryk en Portugal gepars. Daarna het ek huis toe gekom en deel geraak van Klein Constantia se wynmaakspan. In 2004 het ek die geleentheid gekry om Anwilka-wyne saam met mense van Klein Constantia en wynmakers van Bordeaux te begin.
Die vier jaar by Anwilka was van onskatbare waarde. Saam met my internasionale blootstelling het dit aan my die selfvertroue gegee om my eie handelsmerk te begin. In 2008 het ek dus my eie potjie begin krap met TSW. Sedert my eerste oesjaar het ek nog altyd gekonsentreer op twee baie uiteenlopende wynstreke, naamlik Elim en die Swartland.
Ek woon tans in Kommetjie, naby Kaapstad, en maak my wyne in Noordhoek. Behalwe vir alles wynverwant – wynmaak, beoordeling of sommer net drink – maak ek ook tyd om te surf wanneer die kans ook al opduik. Die oseaan herlaai my, en leer my ook geduld en respek vir die natuur.
Irene: Ek het die graad B.Com. aan die Universiteit van Kaapstad behaal en daarna ’n wiskunde- en rekeningkunde-onderwyser geraak. In 1996 het ek ’n kursus deur die Kaapse Wynakademie gedoen het en dit het ’n begeerte in my wakker gemaak om meer te wete te kom oor wyn. In dieselfde jaar het ek amptelik die onderwys vaarwel toegeroep en besluit om ’n wynmaker te word.
Ek het die volgende vyf jaar gereis tussen Australië, Suid-Afrika en Europa om wynervaring op te doen. Tussendeur het ek wiskunde onderrig in Brittanje om die reise te finansier. In 2001 het ek B.Sc.Agric. aan die Universiteit Stellenbosch begin studeer en is uiteindelik beloon met die Professor Perold-trofee as topstudent.
Ná baie reise en studies het ek uiteindelik, op die rype ouderdom van 36, ’n wynmaker geword! Jy’s nooit te oud om jou ware roeping en passie in die lewe te vind nie.
Wat geniet jy die meeste van jou werk?
Trizanne: Die veelsydigheid daarvan.
Irene: Elke dag is ’n nuwe dag met nuwe uitdagings. Jy leer om die onverwagte te verwag.
Dink jy vroue bring ’n ander aspek na die wêreld van wynmaak as mans?
Trizanne: Ons bring ’n ander aspek na hierdie wêreld toe, en dit strek tot by wynmaak. Ek glo ons bring ons eie sin van balans.
Irene: Sonder om te veralgemeen, maar ek dink daar is ’n sekere aandag aan detail sigbaar in wyn wat deur vroue gemaak is.
Is dit moeilik om ’n vroue-wynmaker te wees in ’n bedryf wat steeds deur mans oorheers word?
Trizanne: Ek vind dit nie moeilik omdat dit deur mans oorheers word nie. Jy kerf jou eie plekkie in die son uit, staan vas, glo in jouself en jy werk hard.
Irene: Ek glo jy kan enige struikelblokke oorkom as jy in jouself as wynmaker glo.
Hoe gaan jy Vrouedag deurbring?
Trizanne: Ek gaan surf, om voor te berei vir die Vintners Surf-kompetisie op 10 Augustus. Natuurlik gaan ek ook tyd saam met my man en kinders deurbring. My wens vir vroue is dat hulle ’n oomblik het om hulself uit te druk – nes hulle is.
Irene: Ek gaan die sterk vroue in my lewe, wat nog altyd daar was vir my, vier.
Julle neem albei deel aan die Women of Wine South Africa-fees (WoWSA) die naweek. Watter van jul wyn gaan daar beskikbaar wees?
Trizanne: Ek gaan die Reserve Syrah 2017 vertoon. Dis ’n nuwe oesjaarvrystelling. Dis regtig ’n elegante wyn, selfs meer as die vorige jare, en dis te danke aan die oesjaar. Danksy die elegansie en vroulikheid dink ek dis die perfekte wyn om by die WoWSA te wys. Dis twee kenmerke wat ons as vroue moet vier en trots op moet wees. Mense sal ook die Reserve Sauvignon Semillon kan proe.
Irene: La Bri Chardonnay 2017 is ’n klassieke, elegante Chardonnay gemaak van druiwe uit ’n wingerd wat al 27 jaar oud is. Dis ’n wyn wat mens heeldag lank kan drink, of saam met ’n somerse middagete of bord seekos kan geniet. Ek sal ook die La Bri Affinity 2014, La Bri Syrah 2015 en La Bri Merlot 2016 saamneem WoWSA toe.
WoWSA vind op Sondag 12 Augustus plaas by die Candlewoods Boutique Venue in Centurion. Meer as 50 gesogte wyne sal geproe kan word. Vroue-bierbrouers en spirtiualie-stokers sal ook hul produkte ten toon stel. Kaartjies kos R150 elk en is beskikbaar by Webtickets.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
