Buiten dat die wynbedryf ingevolge vlak 4-regulasies van die inperking geen wyn plaaslik kan verkoop nie, heers daar ook kommer dat die Wes-Kaap nie saam met die res van die land sal aanbeweeg na vlak 3-regulasies nie. Die Wes-Kaap se besmettingskoers is tans aansienlik hoër as die res van die land s’n.
Mnr. Christo Conradie, bestuurder van wynkelders by Vinpro, het tydens die organisasie se streeksinligtingsdag vir die Worcester- en Breedekloofstreek gesê hulle is in gesprek met die regering om te bepaal of die regulasies vir die wynbedryf aangepas sal word as die provinsie nie voortbeweeg na vlak 3 nie.
“Die feit dat die provinsie ’n derde van die toetse in die land doen en so proaktief is, kan in ons gesig ontplof, want nou lyk dit of die Wes-Kaap die provinsie met die meeste besmettings is.”
Hy het gesê hulle is in ’n voortdurende stryd om die regering te oortuig dat die bedryf toegelaat moet word om al op vlak 4 met “gestruktureerde en ingefaseerde” wynverkope voort te gaan.
“Dis egter ’n opdraande stryd, maar ek glo ons het die ekonomiese feite en die belang van die bedryf bekend gemaak. Die regering verstaan dit.
”Die wynbedryf het ’n voorstel aan die regering gemaak om wyn te verkoop op maniere wat lae risiko vir virusoordrag inhou. Mnr. Rico Basson, uitvoerende hoof van Vinpro, het tydens die streeksinligtingsdag op Robertson gesê: “Ons glo as jy wyn binne normale handelsure, maar met volumebeperking, in supermarkte met lisensies kan verkoop, is dit ’n lae risiko. Ons wil nie die ure beperk nie, want dan sal dit lyk soos wat oefening tans lyk tussen 06:00 en 09:00. Mense sal mekaar vertrap en dit sal ’n risiko wees. Ons glo dat e-platforms, aflewering by die huis saam met kos en click and collect by kelderdeure moet kan voortgaan.”
Conradie het gesê die balans moet gevind word tussen veiligheid en ekonomiese oorlewing. “Die ekonomie kan nie langer toebly nie, want die land gaan doodbloei.”
Hy het gesê van 300 tot 400 wynboere sal hul plase moet verlaat as hulle nie toegelaat word om ’n inkomste te verdien nie.
“Die kabinet moet optimale, sinvolle langtermynbesluite neem. Ons gaan aanhou veg dat drankverkope so gou as moontlik so wyd as moontlik kan plaasvind, maar dit gaan nie maklik wees nie.”
Landbouweekblad is steeds beskikbaar op winkelrakke, terwyl sake by https://t.co/J5CsarOmv3 en @landbouweekliks vlot verloop. Lees hier wat jou te doen staan indien jy sukkel om die tydskrif in die hande te kry én hoe jy digitaal kan lees. https://t.co/Ug6tJEMNfl
— landbou.com (@landbou) May 12, 2020
