Dit kom ten spyte van droogtetoestande en rypskade in sommige streke en ’n geskarrel om die laaste sowat 40 000 ton druiwe te oes toe pres. Cyril Ramaphosa die inperking aangekondig het, en aanvanklik wynverwante bedrywighede verbied het.
“Die oes is sowat 8% groter as verlede jaar. Dit beweeg al nader aan die vyfjaargemiddeld,” het mnr. Rico Basson, Vinpro se uitvoerende hoof, tydens die organisasie se inligtingsdag vir die Robertson-streek gesê.
“Ons kom nou uit droogte-oeste uit, so vanjaar se oes het wesenlik meer volume en goeie gehalte opgelewer.”
Die oes, wat sap en konsentraat vir nie-alkoholiese doeleindes, wyn vir brandewyn en distilleerwyn insluit, sal sowat 1046,2 miljoen liter beloop.
Olifantsrivier
Veral in die Olifantsrivier-streek het produksievlakke na normaal teruggekeer, ná hulle tydens die droogte sowat 70 000 ton minder gepars het. Die wingerde het goed herstel na die droogte en watervoorsiening was heelwat beter.
“Hulle het noord van 200 000 ton geoes,” sê Basson.
Stellenbosch, Swartland, Kaap-Suidkus, Paarl en Breedekloof het almal groter oeste opgelewer.
Volgens mnr. Conrad Schutte, Vinpro se konsultasiediensbestuurder, was weerstoestande oor die algemeen gunstig.
Klein Karoo, Noord-Kaap
Basson sê wynboere in die Klein-Karoo staar egter nog baie uitdagings vanweë die droogte en waterbeperkings in die gesig. Dié streek het net minder as 24 000 ton druiwe gepars, wat aansienlik minder as sy gemiddelde opbrengs oor vyf jaar van sowat 38 450 ton. ‘n Krimpende wingerdstand in dié streek het ook ‘n rol gespeel.
Rypskade aan die einde van Oktober in die laerliggende dele oos van Upington in die Noord-Kaap het ‘n beduidende afname in hul druiwe-oes veroorsaak. Waar boere langs die Oranjerivier verlede jaar meer as 115 000 ton gepars het, het hulle vanjaar amper 24 000 ton minder geoes.
Gehalte
Schutte meen Chardonnay en Chenin blanc uit die 2020-oesjaar gaan veral beïndruk.
“Ons is opgewonde oor die voortreflike wyne wat uit die 2020-wyndruifoes gaan voortvloei. Die vroeë druifsoorte het baie goeie suur getoon.”
Wat rooiwyn betref was die kleur- en tannienontledings baie goed. Dit dui op vol wyne met gekonsentreerde geure.
Suid-Afrika is die negende grootste wynprodusent ter wêreld en produseer ongeveer 3,3% van die wêreld se wyn. Die wynbedryf dra meer as R36 miljard tot die land se bruto binnelandse produk by en neem nagenoeg 300 000 mense in diens.Landbouweekblad is steeds beskikbaar op winkelrakke, terwyl sake by https://t.co/J5CsarOmv3 en @landbouweekliks vlot verloop. Lees hier wat jou te doen staan indien jy sukkel om die tydskrif in die hande te kry én hoe jy digitaal kan lees. https://t.co/Ug6tJEMNfl
— landbou.com (@landbou) May 12, 2020
