Al wat ’n bietjie troos, is dat wyne internasionaal en plaaslik beter pryse behaal.
Uitvoer na Brittanje, Suid-Afrika se grootste uitvoermark, het met 26% geval. Dit is ’n daling van 8% in waarde. Die markte in China, Afrika, Swede en Duitsland het ook stoom verloor, terwyl die Amerikaanse mark sywaarts beweeg het.
Me. Siobhan Thompson, uitvoerende hoof van Wosa, meen verlede jaar was een van die moeilikstes nóg vir die wynbedryf. “Die droogte het gelei tot ’n kleiner oes en saam met ’n internasionale ooraanbod het ’n perfekte storm ontstaan. Gevolglik het Suid-Afrika markte teen laer prysvlakke verloor.”
Sawis-syfers toon die geldwaarde van Suid-Afrika se wynuitvoer het verlede jaar met 7% geval tot R8,5 miljard. Die totale hoeveelheid wyn wat uitgevoer is, het tot 320 miljoen liter gekrimp. Die uitvoer van verpakte wyn het met 4% in waarde en 14% in volume afgeneem, maar altesaam 30% minder grootmaatwyn is uitgevoer. Die waarde daarvan het met 17% gedaal.
Mnr. Rico Basson, uitvoerende hoof van Vinpro, het aan Bizcommunity gesê die kleinhandelprys op plaaslike front het met 7% gestyg, hoewel volumes 8% laer is.
Wit aan voorpunt
Die uitvoermarkte het klaarblyklik ’n voorliefde vir Sauvignon blanc, wat die volume-voorloper is. Die waarde van Chenin blanc- en Chardonnay-uitvoer het met 14% toegeneem.
“Die goeie pryse vir Suid-Afrikaanse Cap Classique en vonkelwyn-kategorieë is ook noemenswaardig.”
Vonkelwyn en Cap Classique se uitvoervolumes het egter met onderskeidelik 53% en 6% gedaal.
Die droogte het ’n regstreekse invloed op die sukkelende uitvoer gehad, meen Thompson. Die totale oes het 1,244 miljoen ton druiwe opgelewer.
“Daar was ’n produksie-afname weens die droogte. Hoewel die Wes-Kaap verlede jaar ’n effens gunstiger reënseisoen gehad het as in die vorige drie jaar, het wingerde gesukkel om te herstel en was die oes kleiner as voorheen.”
Beter pryse, waarde groei
Sy is wel optimisties dat hoër pryse op die meeste vlakke verwesenlik is. “Dis nog vroeg, maar ons beskou die beweging na hoërwaarde-wyne as gunstig. Dit vorm deel van ’n groter neiging waaraan die bedryf werk met die oog op 2025.”
Die waarde van verpakte wynuitvoer na Nederland het met 11% geklim. Dis nou die naasgrootste uitvoermark nadat dit Duitsland vir die eerste keer verbygesteek het.
Volgens Basson het die wingerdstand met 7% gekrimp die afgelope vyf jaar. Daar is net 2 873 wynboere in die land oor. Dit is 34% minder as ’n dekade gelede.
“Dit is gunstig dat die hoër pryse tot ’n mate na plaasvlak deurgesyfer het. Die netto boerdery-inkomste het verlede jaar na meer volhoubare vlakke beweeg en dis verblydend dat boere wingerde hervestig.”
Mnr. Conrad Schutte, konsultasiediensbestuurder by Vinpro, verwag vanjaar se oes sal ietwat groter wees as verlede jaar, maar dit sal waarskynlik nie by die vyfjaargemiddelde van 1,360 miljoen ton kom nie.
