Suid-Afrika se pruimbedryf het geskiedenis gemaak deurdat dié bedryf die afgelope seisoen vir die eerste keer meer as tienmiljoen kartonhouers uitgevoer het, sê mnr. Rudi Vos, vrugte-evalueerder by Sapo-trust, Stellenbosch.
Van die redes vir die groter uitvoervolumes is dat groter oeste afgehaal word weens hoër draende kultivars en verbeterde tegnologie, meen Vos. Alhoewel dit nog vroeg is, lyk die vooruitsigte vir die komende seisoen reeds belowend. “Na gelang van die koue-eenhede in die volgende paar maande en reën tydens blomtyd in September, kan ’n goeie oes waarskynlik verwag word,” sê Vos.
Sowat 53% van die pruime wat plaaslik verbou word, word na markte in Europa, Rusland en Brittanje uitgevoer, maar markte in die Verre-Ooste is ook besig om te ontwikkel. In Suid-Afrika is daar tans 8,5 miljoen pruimbome aangeplant op sowat 4 900 ha. Die gewildste kultivars wat gevestig word, is Songold, Laetitia, Fortune (almal middel-seisoen), Ruby Star, Ruby Sun, Suplum41 en Suplum6 (laat kultivars).
