Die meeste rooivleis wat deur Suid-Afrika ingevoer word, kom van Namibië. “Ons het hul vleis nodig,” het mnr. Gerhard Schutte, hoof uitvoerende beampte van die Rooivleisprodusente-organisasie, op die Vleisbeesskool by Aldam in die Vrystaat gesê.
Die byeenkoms wat jaarliks deur Breedplan in samewerking met Landbouweekblad en onder die vaandel van die Lewendehawe Registrerende Owerheid (LRF) aangebied word, duur van 15 tot 17 Oktober. Sowat 250 boere en ander landbouers woon dit by.
Schutte het gesê Suid-Afrika is ’n netto-invoerder van rooivleis omdat genoeg vleis nie plaaslik geproduseer word nie. Daarom is invoere nodig.
Met verwysing na die groot ontevredenheid in Namibië toe Suid-Afrika sy veterinêre vereistes vir die invoer van speenkalwers en ander lewendehawe verhoog het en die gevolg dat uitvoere vanaf Namibië feitlik tot stilstand gekom het, het Schutte gesê die huidige maatreëls om veesiektes uit te hou, is nie voldoende nie en verdere onderhandelings moet plaasvind sodat ’n oplossing gevind kan word. Dit geld ook vir handelsreëlings tussen lande in Suider-Afrika.
Die invoervereistes is later weer verslap, maar daar is steeds spanning onder Namibiese veeboere wat vrees die maatreëls gaan weer verskerp word.
Intussen het die RPO het afgelope weke talle navrae van onder meer Rusland, China en Afrika-lande vir die uitvoer van rooivleis en tegnologie ontvang. Daar is plaaslik en wêreldwyd ’n groot groei in die vraag na rooivleis. Teen 2023 gaan die vraag na beesvleis 20% en na skaapvleis 15% hoër wees as nou. Schutte het gesê produksie moet dus groei en daarvoor is meer navorsing nodig om in die groter vraag te voorsien.
Byskrif:
In ’n gesellige luim by die Vleisbeesskool by Aldam: Mnr. Gerhard Schutte (middel), hoof uitvoerende beampte van die RPO en twee prominente betrokkenes in die Namibiese lewendehawebedryf, mnre. Mecki Schneider (regs), voorsitter van dié land se Lewendehaweprodusente-organisasie, en Ryno van der Merwe, voorsitter van die Namibiese Brahman-telersgenootskap. (Foto: Charl van Rooyen)
