Talle praktiese demonstrasies en lesings van Suid-Afrika se voorste landboukenners op 2014 se Vleisbeesskool by Aldam gaan goud werd wees vir beesboere wat dit bywoon.
Die byeenkoms vind van 15 tot 17 Oktober onder die vaandel van die Lewendehawe Registrerende Owerheid (LRF), Breedplan en Landbouweekblad by die Allemanskraaldam tussen Ventersburg en Winburg plaas. Die hoofborge is Pick n Pay, Molatek, Zoetis, Land Bank, Unistel, Taltec, Sparta, BKB, RPO en Rudd Skaal.
Die tema is vanjaar "Groei en Doeltreffendheid". Daarvoor het dr. Michael Bradfield, hoof van Breedplan Suid-Afrika wat die skool reël, talle buitelandse en plaaslike kenners gevra om die boere te gaan onderrig.
’n Deel van die program word aan praktiese demonstrasies en lesings afgestaan. Een van die kenners wat daaraan deelneem, is mnr. Martin Seyfferdt, voorste interrasbeoordelaar wat oor bul- en koeiseleksie gaan gesels en sy lesse prakties op diere in ’n kraal gaan demonstreer.
Dr. Vlok Ferreira, nasionale tegniese bestuurder van Molatek, gaan met die boere oor presisieboerdery met beeste in ’n ekstensiewe stelsel gesels. Sy kollega, mnr. Johan Mouton, gaan weer oor die afronding van vee op weidings praat.
Nóg ’n praktiese werksessie is ’n besoek aan Sparta se beesvoerkraal by Marquard waar boere kennis sal opdoen wat telers normaalweg nie beskore is nie.
Die prys vir al drie dae, wat verblyf en etes insluit, is R6 360. Mense kan nou reeds op www.stockmanschool.co.za registreer.
