’n Nuwe toepassing maak dit vir boere moontlik om ’n bul, bakkie of enige ander artikel dadelik te verseker – selfs ná gewone winkelure – sonder om eers vir ’n verteenwoordiger te wag om die taak te verrig. Die boer kan dus ’n bul op ’n veiling koop, dit dadelik deur middel van sy skootrekenaar, tablet of slimfoon verseker, die dier oplaai en plaas toe ry sonder vrese dat iets langs die pad kan gebeur wat hom in tamatiestraat sal laat beland.
Die versekeringsmaatskappy Hollard het hierdie gaping op die mark raakgesien en mev. Sanet van der Walt, die maatskappy se nasionale landboubemarkingsbestuurder, het die toepassing, Pixsure, laat ontwikkel. “Dit is nuttig vir versekering en versekeringsbehoeftes wanneer aankope buite gewone winkelure gedoen word en versekeraars en makelaars nie beskikbaar is nie. Die klant kan die toepassing gratis van die internet aflaai en registreer. Android, Apple, Samsung-slimfone en Windows is daarvoor geskik,” sê sy.
’n Hollard-klant kan dan fasette van ’n versekeringsproduk self behartig, byvoorbeeld polisse uitneem en vee en oeste verseker. Bykomende funksies is ’n padbystandproduk en weervoorspellings. Hy kan ook ’n eis dadelik indien deur ’n foto van die beskadigde bakkie, of wat ook al, te stuur. Wanneer hy byvoorbeeld ’n nuwe bakkie of bul koop, neem hy ’n foto van die voertuig, lisensie van die voertuig of bul, vul ’n elektroniese vorm in en stuur dit na die versekeringsmaatskappy, wat die versekeringsproses dan aan die gang sit. Hy kry dadelik bevestiging dat die produk verseker is. Op die foto is mnr. Mike Killasy besig om ’n bees op te veil.
Navrae : Mev. Sanet van der Walt, sel 082 413 8904, web: www.pixsure.. Koste: Pixsure kan gratis afgelaai word.
