Hoewel die produksie van mielies, sojabone en koring wêreldwyd die afgelope dekade meer gestyg het as die groei in die wêreldbevolking, heers daar kommer oor die dalende eindvoorraadvlakke van veral mielies en koring.
Mnr. John Hill, ekonoom van die CME-groep in Amerika en betrokke by die Chicago-graanbeurs (CBOT), het tydens ’n voorlegging by die landbou-afdeling (Safex) van die JSE Bpk. in Johannesburg gesê die afgelope dekade het die wêreldbevolking met 13 % gegroei.
In dieselfde tydperk het die produksie van mielies wêreldwyd met 30 % gestyg, maar die eindvoorraadvlakke het met 25 % gedaal. Die oppervlakte onder mielies het min of meer in dieselfde mate gegroei as die styging in die mielieprys.
“Kyk ’n mens na wat met die wêreld se voorraadvlakke oor die afgelope dekade gebeur het, sien jy dat mielies tans op 13 % staan teenoor 21 % tien jaar gelede, koring is tans op 19 % teenoor 27 % en sojabone het sy posisie op 21 % gehandhaaf,” het Hill gesê.
Lees meer in Landbouweekblad se uitgawe van 28 Augustus 2009.
27 Augustus 2009
